Мăнуксем юратчăр чӗлхене

Сурхури вăл - «сурăх ури» сăмахран пулса кайнă теççӗ, теприсем - «сурăх ырри» тесе калакансем те пур. Çак уяв вăл юмăç ярассипе çыхăннă. Хӗрсем каçпа витене кӗрсе сурăх урине тытнă. Енчен те хӗр аллине така ури лекет - çак хӗр кăçал качча каять, сурăх ури-тӗк - кăçал качча каяймасть-ха.
Анат Камăри 34-мӗш гимназинчи 4-мӗш класра вӗренекен ачасем хулари «Тамаша» театр артисчӗсемпе пӗрле чăвашсен авалхи «Сурхури» уявӗпе савăнтарчӗç. Гимназири уява 4-мӗш классем выляса уявлама пуçларӗç. Ачасем пӗрле пуçтарăнса килӗрен киле çӳрерӗç. Хапăл туса йышăнакансене юрă-ташăпа савăнтарчӗç, кам ачасене кӗртесшӗн пулмарӗ - вӗсене хăртса юрлама пăхрӗç. Кил хуçисем ачасене тӗрлӗрен çимӗçпе сăйлама тăрăшрӗç: печени, пăрçа, çу, тӗрлӗ йышши кӗрпе. Импровизациленӗ ял тăрăх çаврăнса тухсассăн ачасем кучченеçсене пӗрле çиме пикенчӗç.
«Тамаша» артисчӗсем вара çак уява ӗлӗк-авал мӗнле ирттернине питӗ тӗплӗн кăтартса пачӗç. Аслă ăру çамрăксене тăван халăхăн йăли-йӗркисем çинчен каласа пани, кăтартни чи паха самант. Çавна май мăнуксен хăйсен тăван челхине хисеплес, юратас кăмăлӗ вăйланать.