Раççей халăхӗсене халалланă викторина – акăлчанла

Викторина темиçе тапхăрпа иртрӗ. «Раççей кӗввисем» конкурсра командăсен Раççейӗн тӗрлӗ регионӗсене кăтартакан халăх юррисене юрламаллаччӗ. «Nationalities» команда чăваш халăх юррисене юрласа пурне те  тӗлӗнтерчӗ, «Бобрики» команда зала «Тăван çӗршыв-Анне» юрăпа  çутатрӗ. Иккӗмӗш ăмăртура командăсен сӗннӗ апат-çимӗç хăш халăхăн пулнине пӗлмеллеччӗ. Жюри хурав тӗрӗслӗхне кăна мар, ăнлантарни туллин пулнине те хакларӗ – апат-çимӗç историне, усă куракан ингредиентсене тата хатӗрлемелли йăла-йӗркене пӗлни. Викторинăн çак тапхăрӗ чăн-чăн апат-çимӗç çулçӳревӗ пулса тăчӗ, тӗрлӗ халăхсен гастрономи йăли-йӗрки çинчен ытларах пӗлме май пачӗ. Виççӗмӗш тапхăр «Раççее пӗлекенсем» ятлăччӗ. Кунта халăхсемпе çыхăннă тӗрлӗ енлӗ пӗлӳ кăтартма тиврӗ. 

Хӗрӳ тупăшу хыççăн жюри çӗнтерӳçӗсене пӗлтерчӗ. «Бобрики» команда 1-мӗш вырăна, «Nationalities» команда 2-мӗш вырăна тивӗçрӗç. Çӗнтерӳçӗсене хаклă парнесемпе медальсем парса чысларӗç.

Викторина халăхсен хушшинчи туслăха çирӗплетме, Раççей культурине анлăлатма тата çӗршывăн историйӗ патне интерес ӳстерме пулăшакан уçăмлă та асра юлмалли мероприяти пулса юлчӗ. Вăл Раççей халăхӗсен культури мӗн тери пуян та тӗрлӗ пулнине, çак йăла-йӗркене упрама тата малашнехи ăрусене пама мӗн тери кирлине кăтартрӗ.

Альфия Маратовна ЗАКИРОВА, акăлчан чӗлхи вӗрентекенӗ.

Автор сăнӳкерчӗкӗ.