Чăваш Чакăлтăмӗнчи «Пилеш» ансамбле çӳрекенсем хăйсемех кӗпе çӗлесе тӗрлеççӗ

Теччӗ районӗнчи Чăваш Чакăлтăм ялӗнчи «Пилеш» фольклор ушкăнӗн тумӗсем çав тери илемлӗ. Çакăн пек тумланнă иккен ку ялсем ӗлӗк. Ун чух тум паспорт вырăнӗнче пулнă-çке, кӗпе-саппунăн аркисемпе пӗрӗмӗсем, пусми-таварӗн тӗсӗ çине пăхса çын хăш ялтан пулнине пӗлнӗ. Çавăнпа тума Шупашкарта шыраса çӳрес йăла çук пилешсен, вӗсем асанне-кукамайсен кӗписенчен пăхса хăйсемех çӗлеççӗ, тӗрлеççӗ. Çавăнпа тумӗсем куçа илӗртеççӗ те, мӗншӗн тесен вӗсенче ял историйӗ, ăрусен çыхăнăвӗ упранать. Республикăра фольклор ансамблӗсем нумай, сцена тумне «Пилеш» артисчӗсем пек хăйсем çӗлесе тӗрлекенсем тата пур-ши?