Чăваш шкулӗсенчен кăçал сахалрах заявка килнӗ. Кăмăл пуррисен ноябрӗн 3-мӗшӗччен вăхăт пур-ха.

ТР Вӗрентӳпе наука министерствин йышăнăвӗпе РФ халăхӗсен тăван чӗлхисемпе шкул ачисен вулавӗпе наукăпа практика конференцийӗ кăçал та иртет. Октябрӗн 25 – ноябрӗн 3-мӗшӗсенче заявкăсем пухас пӗрремӗш тапхăр пырать, ноябрӗн 3-15-мӗшӗсенче ярса панă ӗçсене жюри пайташӗсем пăхса тухса финалистсене палăртаççӗ. Финала тухнисене заявкăра кăтартнă электрон адрес çине çыру ярса пӗлтерӗç. Ноябрӗн 26-мӗшӗнче виççӗмӗш, пӗтӗмлетӳ, тапхăрӗ пулать. Вăл яланхи пек Хусанти Совет районӗнчи «180№ Нумай профильлӗ полилингвальлӗ гимназире» пулӗ.  

Вӗрентӳ министерствин наци вӗрентӗвӗн уйрăмӗнчен пӗлтернӗ тăрăх, чăваш шкулӗсенчен ытти çултисемпе танлаштарсан заявкăсем сахалрах килнӗ.

Конференцин тӗп тӗллевӗ – вӗренекенсене тăван чӗлхепе интереслентересси, вӗренме хавхалантарасси тата тăван чӗлхепе çырнă кӗнекесене вулама илӗртесси. Унта 9-11-мӗш классенче вӗренекенсем хутшăнма пултараççӗ. Кăçалхи наукăпа практика конференцийӗ 7 секци çине пайланса ӗçлемелле: вырăс, чăваш, тутар, удмурт, мордва, мари, пушкăрт филологийӗсен секцийӗсем.

Кăçал республикăра тăван чӗлхесен тата халăхсен пӗрлӗхӗн çулталăкӗ, çавăнпа ку конференцие чăваш чӗлхипе литературине вӗрентекенсем хăйсен вӗренекенӗсемпе пӗрле йышлăн хутшăнасса шанас килет.

Ирина ГОРДЕЕВА.

О.Бердникова сăнӳкерчӗкӗ.