Çитес çул аннесен капиталне ӳстереççӗ

Раççейӗн Ӗç министерствин ертӳçи Антон Котяков пӗлтернӗ тăрăх, 2022 çулта амăш капиталӗне ӳстереççӗ. Вăл пӗрремӗш ачашăн 503 пин тенкӗ пулать, иккӗмӗшӗшӗн 665 пин тенкӗ.

Министр аса илтернӗ тăрăх, Раççей Пенси фончӗн бюджечӗн проектӗнче амăш капиталӗн индексацине пăхса хунă. «Енчен те пӗрремӗш ачашăн çемье амăш капиталне илнӗ пулсан, иккӗмӗш ачашăн хушма тӳлев 161 772 тенкӗ пулать», – тесе ăнлантарнă вăл.

Кăçал амăш капиталӗ пӗрремӗш ачашăн (2020 çулхи январӗн 1-мӗшӗ хыççăн çуралнишӗн) – 483 пин те 881 тенкӗ. Енчен те кăçал çемьере иккӗмӗш ача çуралсан (çав шута усрава илнисем те кӗреççӗ), хушма тӳлев 155 550 тенкӗ пулать.