Çӗнӗ çул уявӗсем травмпунктра ан иртчӗр

Хӗл кунӗсенчи чи лайăх кану вăл – çунашкапа сăрт çинчен ярăнасси. Юлашки вăхăтра çунашкана  вӗрсе хăпартнă тюбинг  хӗссе кăларма пуçларӗ, халăхра ăна, формине кура ӗнтӗ, «ватрушка» теççӗ. Тюбинга пысăк хăвăртлăхне (сехетре 40-50 километр) кура та юратаççӗ пулмалла. Çапах унпа асăрханса ярăнмалла, унăн тормозӗ çук, çынна пăхăнмасть. Пысăк хăвăртлăхлă тата управлени çуккине кура тюбинг хăрушă шутланать.

Эльметре трагедилле пулăм хыççăн РФ МЧСӗн Тутарстанри управленийӗ республика çыннисене «ватрушкăпа» ярăнни синкерлӗ пулса тухма пултарассине тепӗр хут аса илтернӗ. Унта 23-ри хӗр тюбингпа сăрт çинчен ярăнса анса çурăм, хулпуççи шăммисене хуçса пӗтернӗ, халӗ реанимацире выртать. «Вотсапра»  çӳрекен видеора вăл вилмеллех çапăннă текен хыпар та çӳрерӗ. Тав Турра, хӗр сывă юлнă. Хусанта, республикăри ытти хуласемпе районсенче те ярăнса аманнисем пур. Çынсем ярăнма хатӗрлемен, сывлăхшăн инкеклӗ пулма пултаракан вырăнсенче, çул хӗрринчи сăртсем çинчен те, ярăнаççӗ.

МЧС хытарсах ятарласа хатӗрленӗ вырăнсенче кăна ярăнма сӗнет. Çын нумай çӳрекен вырăнта, трасса çинче йывăç, металл конструкцийӗсем, бетон юпасем пур çӗрте ярăнмалла маррине асăрхаттарать. Ашшӗ-амăшӗсем ку енӗпе ялан тимлӗ мар, ачисене пăхса çитереймеççӗ.  Çăлавçăсем ятарлă трассăсенче, айлăмсемсӗр вырăнта ярăнма сӗнеççӗ, трасса чалăшӗ 20 градусран иртмелле мар. 12 çула çитмен ачасем ятарлă шлем тăхăнмалла.  

Хисеплӗ вулакансем, хăвăра тата ачăрсен сывлăхне упрăр. Çӗнӗ çул уявӗсем ыррипе кăна асра юлччăр.

Реклама