Çӗнӗ çулхи канмалли кунсен статистики

Статистика хăрушă, çавах та пӗлтӗрхи çак вăхăтрипе танлаштарсан, пушарсен шучӗ те, вилнисемпе аманнисем те сахалрах кăçал. Пӗтӗмӗшле кăтартуран 59 пушар харпăр çурт секторӗнче тухнă, вӗсенчен 35-шӗ хушма хуçалăхсенче, 15-шӗ пурăнмалли çуртпа хваттерте, 2-шӗ садри çуртра. 

Пушарсен тӗп сăлтавӗ — вутпа асăрхануллă пулманни, кăмакапа тата электрооборудованисемпе тӗрӗс усă курманни тесе пӗлтернӗ республикăри пушар надзорӗн тӗп инспекторӗ Максим Трущин январӗн 9-мӗшӗнче ТР Министрсен Кабинетӗнче иртнӗ брифингра.

724 АВАРИ

ТР ШӖМӗн статистики те хурлăхлă,  декабрӗн 31-мӗшӗнчен тытăнса январӗн 8-мӗшӗччен республикăри çулсем çинче  пурӗ 724 авари пулнă. 3 водитель, 7 пассажир, вӗсенчен 2-шӗ ача, 3 çуран çӳрекен аманнă. 

Инкексен тӗп сăлтавӗ яланхи пекех – хирӗç çул çине сиксе тухни, çуран каçакана çул паманни тата хӗреслӗ çулпа пынă чух çул-йӗр правилине пăхăнманни. ТР ШӖМӗн пресс-служби çаплах канмалли кунсенче 89 ӳсӗр водителе тытса чарнине те пӗлтерет.