ÇЫРĂН ТА ПАРНЕ ИЛ

Хаклă вулаканăмăрсем, аса илтеретпӗр – апрель уйăхӗнчен пуçласа Тутарстанра тухса тăракан хаçат-журналсен çырăнтару кампанийӗ пырать. Çак майпа усă курса юлма васкăр! «Сувара» 2021 çулăн иккӗмӗш çур çулне çырăнса юратнă хаçатсăр пуçне эсир хаклă парне те выляса илме пултаратăр. Хальхинче тӗп парне мультиварка пулать. Унсăр пуçне шăпа ярса кил-тӗрӗшре, хуçалăхра кирлӗ япаласем вылянтаратпăр, паллах, яланхи пек чăвашла кӗнекесем те пулаççӗ.

«Сувар» – Тутарстанра тухса тăракан пӗртен-пӗр чăвашла хаçат. Паянхи кун вăл чăваш нацине пӗр чăмăра пуçтарса тăракан пӗртен-пӗр хатӗр пулса тăрать. Республикăри чăвашсен тăван чӗлхепе тухса тăракан телекăларăм та, радио та çук. Çавна май вăл пирӗншӗн тата та хак­лăрах. Хаçат информаци хатӗрӗ кăна мар, республикăри чăвашсен пичӗ те. Çакна ăнланакансем, хаклакансем «Сувара» çырăнаççӗ. Пысăк тав сире уншăн.
 Апрель уйăхӗн пуçламăшӗнче Раççей Почти çырăнтару декади ирттернипе хаçат-журналсене йӳнерех хакпа çырăнма май пулчӗ. «Сувара» çак тапхăрта нумайăшӗ çырăнса ӗлкӗрчӗ. Тав сире уншăн.
Редакци пуçарнă акцие хутшăнас тесен «Сувара» 2021 çулăн 2-мӗш çур çулне çырăнăр та квитанцие (е унăн копине) редакцие ярса парăр. Хăвăрăн ятăр-хушаматăра, тулли адресăра, телефон номерне палăртма ан манăр. Квитанцисене июлӗн 5-мӗшӗччен йышăнатпăр, вӗсене  почта урлă çырупа та, электронлă адреспа та яма юрать.
«Сувар» хаçата кашни çыхăну уйрăмӗнчех Тутарстанра П2340, Раççейре П7093 индекспа çырăнса илме май пур. Çавăн пекех «ТАТМЕДИА» акционерлă обществăн http://tatmedia.ru/podpiska  тата Раççей Почтин https://podpiska.pochta.ru сайчӗсене кӗрсе çырăнма пулать.

Ирина ТРИФОНОВА,
тӗп редактор.
 К.Малышев сăнӳкерчӗкӗ.