Сувар

Кивӗ Улхаш истребительне летчиксене халалланă

Самолет-палăкăн вырăнӗ те пӗлтерӗшлӗ, ăна ӗлӗкхи ял кантурӗ вырăнне лартнă. Шăпах çак вырăнтан ял-йыш арçынсене Тăван çӗршывăн Аслă вăрçине ăсатнă.

Ульяновск облаçӗнчи Чăнлă районне кӗрекен Кивӗ Улхаш ялӗнче Тăван çӗршывăн летчикӗсене халалласа самолет-палăк уçăлчӗ. Ăна область кӗпӗрнаттăрӗ С.Морозов, район администраци пуçлăхӗ Х.Рамазанов, облаçри ветерансен канашӗн председателӗ С.Ермаков тата ытти сумлă хăнасем ял-йышпа пӗрле уçрӗç. Асра юлмалли кун пулчӗ вăл. Ульяновскри авиаци маршалӗ Б.П.Бугаев ячӗллӗ граждан авиацийӗн курсанчӗсем çар оркестрӗн маршӗпе палăк умне  кӗпӗрнаттăр, ытти хăнасен ятӗнчен чӗрӗ чечексем хучӗç.

«Тăван çӗршыва тăшмансенчен хӳтӗленӗ аттесемпе асаттесене сума суни тата çамрăк ăрăва патриотизм воспитанийӗ пани ку»,– терӗ Сергей Морозов кун пек пысăк та пӗлтерӗшлӗ палăксем облаçра нумай маррине палăртса.

Чăваш ялӗнче, Кивӗ Улхашра, патриотизм паркӗн комплексне йӗркеленӗ пуçару ушкăнне кӗпӗрнаттăрăн Тав хучӗпе чысларӗç. Сăмах май, пуçару ушкăнне çак ялта çуралса ӳснӗ, хальхи вăхăтра Сочи хулинче пурăнакан запасри полковник Николай Шуреков ертсе пырать. Самолет-палăка «Ульяновскгражданпроектпа» «СтройПроектИзыскания» тулли мар яваплăхлă обществăсем вырнаçтарнă.

Самолет-палăкăн вырăнӗ те пӗлтерӗшлӗ, ăна ӗлӗкхи ял кантурӗ вырăнне лартнă. Шăпах çак вырăнтан ял-йыш арçынсене Тăван çӗршывăн Аслă вăрçине ăсатнă. Икӗ çул каялла кунтах танк тата зенит орудийӗсене вырнаçтарнă пулнă, халӗ акă тата истребитель. Çапла ял варринчи çак вырăн çарпа патриотизмăн илемлӗ парк комплексне çаврăнчӗ. (Автор сăнӳкерчӗкӗ)

Нравится
Поделиться:
Реклама
Комментарии (0)
Осталось символов: