Сувар

г. Казань

16+
Çӗнӗ хыпарсем

Оксана Фёдорован фончӗ йӗркеленӗ фестиваль виçӗ кун классика музыкипе, унăн пултаруллă яш-кӗрӗмӗпе паллаштарчӗ

Мартăн 19 – 21-мӗшӗсенче Хусанта «Моя Россия: музыкальное путешествие» Пӗтӗм Раççейри фестиваль иртрӗ. Ăна РФ тава тивӗçлӗ артисткин, 2002 çулта «Мисс Вселенная» ята илнӗ Оксана Фёдорован фончӗ Президентăн культура пуçарăвӗсен фончӗ тӗрев панипе йӗркеленӗ. Фестиваль тӗллевӗ – нацин культура еткерне чапа кăларасси, классика музыкине суйласа илнӗ пултаруллă çамрăксене пулăшасси тата классика музыки çине таянса çӗршывăн регионӗсене пӗрлештересси.

Виçӗ куна пыракан фестиваль маршрутне сакăр хулана кӗртнӗ йӗркелӳçӗсем. 2024 çулхи октябрь уйăхӗнче Псковра, Мускавра, Санкт-Петербургра, Ӗпхӳре иртнӗ те ӗнтӗ фестиваль кунӗсем, шучӗпе Хусан пиллӗкмӗш хула пулчӗ. Апрельте фестиваль Курск­ра пулать, унтан Тверьте иртӗç фестиваль кунӗсем, июньте Кисловодскра вӗçленет. 

Мускаври музыка экскурсийӗ
Мартăн 19-мӗшӗнче «Мир» кинотеатрта «Музыкальное путешествие по Москве» фильм кăтартнинчен пуçланчӗ фестиваль. Кăшт маларах Оксана Фёдорова, фонд директорӗ Татьяна Иванова тата Пысăк театр солисчӗ Александр Полководцев «Татар-информ» информаци агентствинче журналистсемпе тӗл пулчӗç, хăйсен ӗçӗ-хӗлӗ çинчен каласа пачӗç, ыйтусем çине хуравларӗç.

Фильмсене 2021 – 2023 çулсенче ӳкернӗ, телепроектăн пӗр пайӗ тесе ăнланма пулать ăна. Пӗтӗмпе 20 фильм, кашни хăйне евӗр, кашни интереслӗ.  Оксана Геннадьевна «Музыкальное путешествие по Москве» фильмăн режиссерӗ те, тӗнче пӗлекен классика композиторӗсем, юрăçисем çинчен каласа параканӗ те. Киносеанс пынă вăхăтра куракансем Фёдор Шаляпин пурăннă хваттерте те, Александр Скрябин килӗнче те, Петр Чайковский чарăнса тăнă вырăнсенче, Сергей Рахманинов, Сергей Прокофьев патӗнче пулса курнă çеç мар, вӗсем мӗнле пурăнни, мӗнпе усă курни çинчен кăсăкланмалла каласа панине итлерӗç. Кино ӳкерекенсен команди çак çынсем пирки нумай пӗлни курăнать, апла пулин те музейсенче экспертсем пулса музей ӗçченӗсем халиччен ниçта вуламаннине, илтменнине каласа параççӗ. Тӗслӗхрен, Фёдор Шаляпин лайăх ӳкернӗ çеç мар, спектакль умӗн гримне те хăйех ăсталанă. Çакна вăл килӗнче тунă иккен, сцена тумӗсем, реквизитсем юрăç килӗнче пайтах.

Петр Чайковский çинчен Денис фон Мекк, Петр Ильича укçа-тенкӗпе те, ăшă сăмахпа та нумай çул пулăшса тăнă Надежда фон Мекк мăнукӗн ывăлӗ каласа панă.  Паллă классиксем çинчен ытларах пӗлес текенсем музыкальное путешестие.рф сайта кӗрсе пăхма пултараççӗ фильма. Ăна 2021 çултах ӳкернӗ, халиччен фонд сайтӗнче, телевизорпа кăтартнă. Оксана Фёдорова пӗрремӗш хут пысăк экранран кăтартнине пӗлтерсе:  «Пирӗн паян дебют пулчӗ», – тесе палăртрӗ. Фондăн çӗршывăн культура еткерне пуянлатакан пултаруллă çынсем çинчен тата та фильмсем пур. 

Пултаруллă ачасемпе

Фестивалӗн иккӗмӗш кунӗ Хусанти çамрăк талантсемпе иртрӗ. Хулари 2№ музыка шкулне çак кун чи пултаруллисем пуçтарăннă-тăр. Фестиваль витӗмӗпе «Юные таланты Татарстана» концерт, мастер-классем ирттернӗ. Концерта Хусанти, Çырчаллинчи, Санкт-Петербургри çамрăк музыкантсем хутшăннă. «Моя Россия: музыкальное путешествие» конкурса хутшăнса лауреат, дип­ломант ята çӗнсе илнӗ вӗсем. Çаплах Тутарстанра иртнӗ конкурссен лауреачӗсемпе стипендиачӗсем пулнă. 

Гала-концерт

Фестиваль кунӗсем  мартăн 21-мӗшӗнче А.Пушкин ячӗллӗ Культура центрӗнче ыркăмăллăх концерчӗпе вӗçленчӗç. Шăп çак тапхăрта вырăс наци композиторӗсен çуралнă кунӗ – мартăн 18-мӗшӗнче Николай Римский-Корсаков, мартăн 21-мӗшӗнче Модест Мусоргский çуралнă. Гала-концерта та çак паллă композиторсене халалланă, программăна вӗсем çырнă романссемпе оперăсенчи арисене кӗртнӗ. Оксана Фёдорова (меццо-сопрано), Александр Полководцев (баритон) тата пирӗн ентеш, Оксана Фёдорова фончӗн лауреачӗ Александр Кузьмин юрларӗ, Хусан мэрӗн стипендиачӗ Умар Бикбаев баян каларӗ. Артистсен концертмейстерӗ, фортепиано калаканӗ Анна Сысоева пулчӗ. Оксана Геннадьевна вăл та Хусантан пулнине пӗлтерчӗ. Хӗр Александр Кузьмина пулăшма пынă иккен Мускава. Çакăнта асăрханă та ăста пианисткăна, фестивале хутшăнма чӗннӗ. Йӗркелӳçӗсем Александр Кузьмина фестивалӗн паллине – статуэтка тата 15 пин тенкӗ укçан преми парса хавхалантарчӗç.

Сăнӳкерчӗк «Татар-информ» ИА.
 

Следите за самым важным и интересным в Telegram-каналеТатмедиа


Оставляйте реакции

0

0

0

0

0

К сожалению, реакцию можно поставить не более одного раза :(
Мы работаем над улучшением нашего сервиса

Нет комментариев

Теги: фестиваль культура Музыка