Шăнкăрчсем валли 20 йăва хатерленӗ

Кăçал хӗл сивӗ пулмарӗ, юр та нумай çумарӗ, çуркунне ир килчӗ. Çавна кура шкул ачисем, шăнкăрчсем ир таврăнасса сиссе, ӗç урокӗсенче яланхинчен маларах йăвасем хатӗрлеме пуçланă. Ку ӗçре вӗренекенсене кăçал ӗç урокне илсе пыракан вӗрентекен Александр Владимирович Никитинсăр пуçне Пӳлер лесничествин ӗçченӗсем хăйсем те килсе пулăшнă. Опытлă вăрманçăсем Исаак Васильевич Охотников, Александр Николаевич Гаврилов тата Георгий Георгиевич Львов Емелькино шкулӗнче яланах кӗтнӗ хăнасем. Вӗсем ачасене вӗçен кайăксем валли йăвасем ăсталас ӗçре те пулăшаççӗ, çавăн пекех вăрманпа çыхăннă историсем каласа параççӗ, çак енӗпе ăçта вӗренме кайма пулни пирки те ăнлантараççӗ. 

Акă кăçал та çурхи каникула кайиччен 5, 7, 8 тата 9-мӗш классенче вӗренекенсем Пӳлер лесничествине 20 шăнкăрч йăви хатӗрлесе панă. Александр Владимирович каланă тăрăх, Артем Гордеев (5-мӗш класс), Антон Бряндин (6-мӗш класс), Дария Коннова, Андрей Марков , Ангелина Пет­рова (7-мӗш класс), Егор Егоров, Никита Марков, Егор Михайлов (8-мӗш класс) тата Вадим Антонов (9-мӗш класс) ӗç урокӗсенче тăрăшса ӗçленӗ. Пуртă-пăчкăпа каскаласси, мăлатукпа çапасси хӗрача ӗçӗ мар пулин те Емелькино шкулӗнче вӗренекен пикесем нимле ӗçрен те ютшăнмаççӗ, арçын ачасемпе тан тăрăшаççӗ. Вӗсене, паллах, арçын ачасем те, вӗрентекенпе вăрманçăсем те пулăшаççӗ. «Пӗлни пăсмасть», – теççӗ вӗсем. 

Вӗренекенсем ăсталанă илемлӗ йăвасене кăнтăртан таврăннă шăнкăрчсем йышăнма пуçланă та ӗнтӗ. Ачасем вара пуçланă ӗçе вӗçленипе савăнса хальхи вăхăтра çурхи каникулта канаççӗ.

А.Никитин сăнӳкерчӗкӗсем.