Тутарстанра Беларусь делегацийӗ

 Беларусь Республикин Минск облаçӗн парламент делегацийӗ (ертӳçи Минск облаçӗн Депутатсен Канашӗн председателӗ Наталья Викторовна Якубицкая) Тутарстана ӗçлӗ визитпа виçӗ кун пулчӗç. Пилӗк çынран тăракан ушкăна Стародорожски районӗн халăх депутачӗсен председателӗ Дмитрий Михайлович Давыдов, «Купалинка» УАО генеральнăй директорӗ, Минск облаçӗн Депутатсен Канашӗн депутачӗ Татьяна Николаевна Ярота, «Антей сад» хресчен хуçалăхӗн пуçлăхӗ тата Минск облаçӗн Депутатсен Канашӗн депутачӗ Виктор Иосифович Чеботарь, Минск облаçӗн Депутатсен Канашӗн депутачӗ, тӗп специалисчӗ Ольга Васильевна Мишина кӗнӗ. Паллах, Тутарстанра пурăнакан ентешӗсемпе тӗл пулассине те плана кӗртнӗ.  «Спадчына» обществăлла организацин хастарӗсемпе Тутарстан Халăхсен Туслăх Çуртӗнче тӗл пулнă. Тӗрлӗ наци обществисене пӗр çӗрте туслăн хăйсен культурине аталантарса, йăли-йӗркисене тытса пыма условисем туса пани Наталья Якубицкаяна питӗ кăсăклантарнă. Тăван çӗршывне таврăнсан çакăн пек организаци уçасси пирки ӗçлесси çинчен каларӗ пресс-конференцире. Ахальтен мар белоруссем Туслăх Çурчӗн кун йӗркипе, ӗçӗ-хӗлӗпе тӗплӗн паллашнă.  

Тутарстан енчен делегацие ТР Патшалăх Канашӗн Председателӗ Фарид Хайруллович Мухаметшин, ТР Патшалăх Канашӗн секретарӗ Лилия Маврина, парламент комитечӗсен председателӗсем Альберт Хабибуллин, Азат Хамаев тата ыттисем йышăнчӗç. Фарид Хайруллович Тутарстанăн ӗçӗ-хӗлӗ çинчен кӗскен каласа пачӗ, республикăн çитӗнӗвӗсенчен чылайăшӗ Федерацин наци проекчӗсемпе программисене хутшăннипе çыхăннă тесе ăнлантарчӗ вăл. Беларусь Республикин регионӗсемпе экономика çыхăнăвӗсем ӳснине те палăртрӗ Патшалăх Канашӗн Председателӗ. Çак тӗлпулура сӳтсе явнă ыйтусене парламентпа тишкерсе Правительствăна сӗнӳсемпе тухассине пӗлтерчӗ.