Тутарстанри Халӑхсен ассамблейи тӗп халӑхсен тӑван чӗлхисене упрассипе ӗҫсене пӗтӗмлетрӗ

Паян, февралӗн 27-мӗшӗнче, Тутарстанри Халӑхсен ассамблейипе 2022-2032 ҫулсенче Тутарстан Республикинче тӗп халӑхсен чӗлхисемпе Халӑхсен хушшинчи вунӑҫуллӑхне халалланӑ мероприятисене ирттерессипе йӗркелӳ комитечӗн пӗрлехи  ларӑвӗ Хусанти А.С.Пушкин ячӗллӗ Культура центрӗнче иртрӗ. 

Ларӑва ТР Патшалӑх Канашӗн Председателӗ, Тутарстанри Халӑхсен ассамблейин Председателӗ Фарид Мухаметшин йӗркелесе ертсе пычӗ. Ассамблея Председателӗ президиумпа паллаштарса кӑҫалхи ларӑва РФ Халӑхсен ассамблейин Канашӗн Председателӗн ҫумӗ Назиржон Абдуганиев хутшӑннине пӗлтерчӗ. 

Фарид Мухаметшин палӑртнӑ тӑрӑх, ӗҫлӗ ларӑва наципе культура автономийӗсен ертӳҫисем, муниципаллӑ районсенчи социаллӑ уйрӑм пуҫлахӗсем, культура учрежденийӗсен, массӑлла хыпар хатӗрсен представителӗсем хутшӑннипе ирет.

Ассамблея Председателӗ кӗскен пӗлтӗрхи ӗҫсен пӗтӗмлетӗвӗсем ҫинчен каласа НКО ертӳҫисене тухӑҫлӑ ӗҫленӗшӗн тав турӗ. РФ Президенчӗ Владимир Путин Тутарстана тӗрлӗ нацисен культурисене, вӗсен тӑван чӗлхисене упраса хӑварассипе тӗслӗхлӗ регион шутне кӗртнине асӑнчӗ. 

Салам сӑмахӗсем Назиржон Абдуганиев та каларӗ. ТР Культура министрӗ Дамир Натфуллин республикӑра пурӑнакан халӑхсен тӑван чӗлхисене упраса хӑварассипе тӗрлӗ мероприятисемпе проектсем пурӑҫланнине, вӗрентӳ учрежденийӗсене кӗнекесемпе тивӗҫтернине палӑртрӗ. Архивсенче халӑхсен чӗлхисемпе миллион ытла тӗрлӗ документ упраннине асӑнчӗ. 

Доклад тӑвакансен шутӗнче ТР вӗрентӳпе наука министрӗн ҫумӗ Минзалия Закирова, Тутарстанри Халӑхсен ассамблейин Ӗҫтӑвкомӗн ертӳҫи Ренат Валиуллин, Хусанти Туслӑх Ҫурчӗн директорӗ Тимур Кадыров, Хусанти Нумай нациллӗ вырсарни шкулӗн директорӗ Маринэ Хухунашвили пулчӗҫ. 

Канашлӑвӑн пӗтӗмлетӗвӗсемпе "Сувар" хаҫатӑн ҫитес номерӗнче вуласа пӗлме пултаратӑр.