Журналистсем патне Президент килчӗ

Апрелӗн 23-мӗшӗнче ТР Президенчӗ Рустам Минниханов «ТАТМЕДИА» акционерлă обществăна журналистсемпе тӗл пулас тӗллевпе килсе кайрӗ. Ун филиалӗсен шутне кӗрекен республикăра тухса тăракан хаçат-журналсен ертӳçисем пурте Zoom платформа урлă республика ертӳçипе видеоконференцие хутшăнчӗç.

Рустам Минниханов журналистсене çак йывăр вăхăтра та ӗçлеме пăрахманшăн тав турӗ. «Эсир тухтăрсемпе пӗр ретре тăратăр паян. Маска, перчетке тăхăнатăр та репортаж е интервью тума каятăр. Паллах, сирӗн ӗç хăйнеевӗр, пӗр вырăнта ларса ӗçлеме çук.  Теветкелленсен те асăрханса кăна. Сире те килте çемйӗрсем кӗтеççӗ», – терӗ Президент. Корнавируса пула хаçат-журналсем те йывăрлăха кӗрсе ӳкрӗç, патшалăх пулăшăвӗсӗр май çук. Республика ертӳçи пирӗн ыйтусене пăхса тухса тимлӗхсӗр хăвармасса шанас килет.