Чăвашла вуламасан, çырмасан чӗлхе мăкалать

Мана Наталья Лазаревна Ильмендеева тесе чӗнеççӗ. Эпӗ 68-па пыратăп. Ачалăхпа яш çулсем Çарăмсан районӗнчи Çӗнӗ Йӗлмелӗ ялӗнче иртнӗ. Киремет шкулӗнче 5 çул нимӗç чӗлхи вӗрентрӗм. Качча тухсан Çарăмсанра бухгалтерта ӗçлерӗм. Халӗ тивӗçлӗ канура: мăнуксене пăхма пулăшатăп, пахчара аппаланатăп.

Чăвашла вуламасан, çырмасан чӗлхе мăкалать. Çавăнпа та чӗлхене кăштах якатас шухăшпа «Сувар» çырăнса илме шутларăм. Хаçатăн 9-мӗш  номерне илсен пӗтӗм ӗçе пăрахса малти страницăран пуçласа вӗçне çитиччен пӗр чарăнмасăр вуласа тухрăм. Эх, мӗнле тунсăхланă иккен эпӗ тăван чӗлхешӗн! Чăвашла вуламанни нумай пулатчӗ. 

Хаçат питӗ интереслӗ, нумай çӗнӗ хыпар пӗлтӗм. 2-мӗш страницăра палланă хӗрсене курах кайрăм. Пӗри, Шура Ильдирякова, Çӗнӗ Йӗлмелӗрен, тепри, Лидия Квакова, Акрелӗнчен. Лидийăна эпӗ Киреметре ӗçленӗ чухне вӗрентнӗччӗ. Вӗсем Хусанта уяв мероприятийӗнче хаклă хăна шутӗнче пулса курнишӗн питӗ савăнтăм. Питӗ пултаруллă, ӗçчен те маттур хӗрарăмсем вӗсем. Çарăмсанри Культура çуртӗнче пире хăйсен çӗнӗ юррисемпе, ташшисемпе час-час савăнтараççӗ. Тавах вӗсене!

Тата çакна та калас килет: эпӗ çав тери савăнатăп Порфирий Васильевич Афанасьевшăн! Вăл пирӗн Çӗнӗ Йӗлмелӗре çуралса ӳссе çавăн пек пысăк çын пулчӗ! Порфирий Васильевича çирӗп сывлăх, телей, вăрăм кун-çул, ăнăçу сунатăп, малашне те пире, вулакансене, хăйӗн пултарулăхӗпе савăнтарсах тăтăр. Вăл – пирӗн ялăн мухтавӗ, Çӗнӗ Йӗлмелӗн ятне-сумне çӗклет. Тавах Порфирий Васильевича!

Манăн та хăш чухне сăвă çырас кăмăл пысăк. Вӗсенчен пӗринпе, «Тăван ялăм» ятлипе, сире те паллаштарас килет:

Тăван ялăм, Çӗн Йӗлмелӗ!

Эс яланах куç умӗнче.

Юхать, юхать сан айлăм тăрăх

Хăю евӗрлӗ шыв – Сӗнче.

Асран тухмасть киремет айӗ – 

Ăçта эп чупнă çаруран.

Хурсене кӗтнӗ, шыва кӗнӗ,

Вăйă вылянă мăй таран.

Кунта юлман шурă хурăнлăх,

Çухалнă ватă йăмрасем.

Пусать, пусать чӗрене тунсăх –

Асра ачалăх кунӗсем...

Пурнать ялта пит ӗçчен халăх:

Тăван, кӳршӗ, юлташăмсем. 

Ӳсет вӗсен кунсерен пурлăх – 

Чупаççӗ иномаркăсем.

Тавах сана, тăван Йӗлмелӗ!

Пире хавас кӗтсе илен. 

Туслăх, ӗçченлӗх, мухтав сăнӗ

Кӳрет сана ялан илем.

Наталья ИЛЬМЕНДЕЕВА.

Çарăмсан районӗ,

Çарăмсан.