«Сувар» – чи юратнă хаçат

Валентина Савинăна, Упири вăтам шкулта кӗçӗн классен вӗрентекенӗнче 40 çул ӗçленӗскере, шкул пурнăçӗ пирки вулама кăсăклă иккен.

– Вăтăр çул каяллахипе хальхи вӗрентӳ тытăмне танлаштарсан пӗлӳ парасси нумай енчен улшăннă. Шкулсенче иртекен тӗрлӗ мероприятисем пирки вуласа савăнатăп. «Тăван Атăл» журнала та çырăнса илсе вулатăп.

– Почта ещӗкӗнчен илсен пӳрте кӗричченех хаçатпа паллашатпăр, ăшă чухне урамри сак çине ларса вулама кăмăллатпăр. Хăш-пӗр  статьясене пӗрле сӳтсе яватпăр, – Люсьăпа Николай Адъютантовсем те хаçата юратса вуланине пӗлтерчӗç.

– Тавах хаçатра ӗçлекенсене! Малашне те çӗнӗлӗхсемпе савăнтарсах тăччăр, вăрăм ӗмӗрлӗ пултăр хаçатăн кун-çулӗ, – терӗç тепӗр ушкăн хӗрарăмсем.

– Упи енчи хыпарсем пулсан тата ытларах хавхаланса вулатпăр, хăйне евӗр кăсăклă пек, – терӗ Галина Ярухина савăнса та хăпартланса.

Канаш поселокӗнчи Викторовсем те каннă хушăра хаçат вулаççӗ, çырнисемпе кăмăллă пулнине палăртрӗç.

Çыхăну уйрăмне коммуналлă пулăшусемшӗн тӳлеме килнисем те черетре тăнă вăхăтра хаваспах килӗшрӗç хаçат çинчен хăйсен шухăшӗсене пӗлтерме.

– Эрнекуна кӗтсе хаçатри калавсене икӗ хут та «шӗкӗлчесе» тухатăп, питӗ кăмăллă çыраççӗ. Темӗн те пур кирли, темӗн çинчен те вуласа пӗлме пулать. Ытларах литература страници чуна çывăх, – пӗлтерчӗ Упи ялӗнче пурăнакан Лидия Морозова. – Калавсем ытларах пичетленсен тата аван пулӗччӗ.

– Сывлӑха упрамалли тӗрлӗ мелсем пирки, хамӑр патра ӳсекен сиплӗ курӑксен усси çинчен, тухтӑрсен канашӗсене кӑмӑлласа вулатӑп. Кирлӗ сӗнӳсемпе пурнӑçра усӑ куратӑп, – терӗ Турхан Упире пурăнакан Ольга Сердцева. 

Уписем хаçат çырăнас енӗпе яланах хастаррисен йышӗнче пулнă. Хальхи çырăнтару тапхăрӗнче те вулакансен шучӗ чакмасса, малашне те шанчăклă туссен йышӗнче пӗрле пуласса шанса тăратпăр. Чун апачӗсӗр пурнăç çук. 

Юрий АДЪЮТАНТОВ.

Çӗпрел районӗ,

Çӗнӗ Упи.

Автор сăнӳкерчӗкӗ.