Çӗнӗ наци проекчӗ ял хуçалăхне ӗçченсемпе тивӗçтерӗ

Наци проекчӗсене пурнăçласа Тутарстан Республикинчи ял хуçалăха аталантарассипе туса ирттернӗ ӗçсем çинчен, кăçал хута кайнă «Апат-çимӗç хăрушсăрлăхне технологипе тивӗçтересси» («Технологическое обеспечение продовольственной безопасности») çӗнӗ наци проекчӗпе палăртнă плансем çинчен ТР ял хуçалăх министрӗн çумӗ Марсель Махмутов каласа пачӗ. 

2030 çулччен пыракан проектсемпе çӗршывăн агропромышленность комлексӗн хăватне ӳстересси тӗллевре. Унччен, хальхипе танлаштарасан, 25 процент ӳстерме палăртнă продукцие, экспорта ăсатассине 1,5 хут ӳстерессине те плана кӗртнӗ. Çӗнӗ наци проекчӗн пилӗк федераллă проекчӗсенчен пӗри «АПК кадрӗсем». Ял хуçалăхӗнче ӗçлекенсене, агропромышленность предприятийӗсем валли кадрсем хатӗрлекен вӗрентӳ заведенийӗсене пысăк тимлӗх уйăрассипе, пулăшу, çăмăллăхсем парассипе çыхăннă вăл. Ку енӗпе проекта 2025 — 2027 çулсенче 3,4 миллиард тенкӗ уйăраççӗ(ку суммăран 2,2 миллиард тенкӗ федераллă бюджетран, 886 миллион — республика бюджетӗнчен). Ял хуçалăхӗ валли кадрсем хатӗрлекен колледжсемпе техникумсенче, университет-институтсенче реконструкци ирттернин, юсанин, оборудованипе тивӗçтернин тăкакӗн 90 процентне саплаштарасси пирки асăннă. Анчах мӗнле суммăран саплаштарасси пирки уççăн каламанни ыйтусем çуратать: пӗтӗм тăкакран е пӗр-пӗр сумма пирки сăмах пырать.

Ялсенчи шкулсенче агроклассем уçасси пур планра, ку пуш сăмах мар, ресубликăра 16 вăтам шкул завка панă та ӗнтӗ. Вӗсенче физика, хими, математика, биологи тарăннăн вӗрентӗç. Пулас ӗç паракан (ял хуçалăх предприятийӗ, организацийӗ), профильлӗ вăтам, аслă пӗлӳ паракан вӗренӳ заведенийӗсем те хутшăнӗç. 

Ку проекта пурнăçлама 2025 çулта 892 миллион тенкӗ уйăраççӗ. Çак суммăран 635 миллион тенкӗ федераци бюджетӗнчен, 168 миллион — республикăн, 88 миллиона яхăн — бюджета кӗмен укçа-тенкӗрен. 

Депутатсем яллă вырăнсене комплекслă аталантарас ыйтăва та сӳтсе яврӗç. Ял ипотеки унчченхи пекех 3 процент, анчах улшăнусем те пур.

Сăнӳкерчӗк ТР Патшалăх Канашӗн пресс-службин.