Аталанма ан чарăн, «Аталан»
Иртнӗ эрнекун Хусанти Халăхсен Туслăх çуртӗнче çак пысăк пулăм чăваш çамрăкӗсене çеç мар, аслăрах çултисене те пуçтарчӗ. Хусанта çамрăксен пӗрлӗхӗ «Сувар» хаçат редакцийӗ çумӗнче «Асамат» ятпа 1999-2000 çулсенче пӗрлешнӗччӗ. Унăн тӗллевӗсем, кун йӗркисем, тӗпрен илсен, паянхинчен пит уйрăлсах тăман. «Аталан» пекех «Асамат» тӗрлӗ енчен (ытларах чухне ялсенчен) килнӗ çамрăксене хула пурнăçне хăнăхма пулăшма тăрăшатчӗ. Яшсемпе хӗрсем чăваш юрри-ташшине, культурине пӗрле тӗпчетчӗç, çӗнӗ юрăсем, хайлавсем çырса хăйсем те тăван культурăна тӳпе кӗртетчӗç.
