Çӗпӗр чăвашӗсем патӗнче хăнара
Тухăç Çӗпӗре экспедицие пыма пире 2022 çулхи юпа уйăхӗнче Шупашкара Новосибирскран килнӗ тӗпчевçӗ Екатерина Игоревна Исмагилова (Жимулева) чӗнчӗ. Екатерина Исмагилова – искусствоведени кандидачӗ, Раççей Наукăсен академийӗн Çӗпӗр уйрăмӗнчи Филологи институчӗн Çӗпӗр халăхӗсен фольклор секторӗн ăслăлăх аслă сотрудникӗ. 2022 çулхи кӗркунне вăл Шупашкара Чăваш патшалăх гуманитари ăслăлăхӗсен институчӗн ăслăлăх архивӗнче ӗçлеме, Чăваш патшалăх гуманитари ăслăлăхӗсен институчӗ ирттерекен конференцие хутшăнма килнӗччӗ. Вара эпир, Екатерина ятлă 12 çулхи кӗçӗн хӗрачапа иксӗмӗр, çулталăк тенӗ пек Çӗпӗре каясси çинчен шухăшласа, инçе çула хатӗрленсе пурăнтăмăр. Тӗрӗссипе каласан, инçе çул илӗртет те, шиклентерет те. Çӗпӗр çулӗ тени хăйех çирӗп илтӗнсе тăрать. Тӗрлӗ ассоциаци çуратать. Хурăнлă çул куç умне тухса тăрать.
