ЧĂВАШСЕМ ЮЛМАÇÇӖ ТЕ-И-ХА?

Нумай пулмасть Чăваш Енри юлташăм, виçӗ ача амăшӗ, çемйипех Мускава пурăнма куçса каясси пирки каларӗ. Çакна вăл тăван тăрăхра лайăх тӳлекен ӗç çуккипе çыхăнтарчӗ. «10 пин тенкӗпе мӗнле пурăнмалла-ха пирӗн, ачасене ӳстермелле вӗт?!» – терӗ ку лару-тăру йăлăхтарса çитернине палăртса. Мана, паллах, унран уйрăлма çăмăл мар. Çапах та нимӗн те тăваймăн, пурнăç хистет. Хальхи вăхăтра Чăваш Енре Мускавпа Санкт-Петербурга, пурнăç условийӗсем лайăхрах тата ытти регионсене ӗçлеме кăна мар, пурăнмах куçса каякансем йышланнă иккен. Чăвашстат пӗлтернӗ тăрăх, пӗлтӗр январь-октябрь уйăхӗсенче регионтан 17,104 пин çын куçса кайнă. Ку вăл Раççейри пӗр пӗчӗк хула чухлӗ. Миграци Канаш хулинче чи вăйлă палăрать. Районсенчен Шупашкара куçакансем те сахал мар, пӗлтӗр январь-июль уйăхӗсенче кăна 17,1-шӗ хула çынни пулса тăнă. Халăхсен çӗршыв тăрăх миграцийӗ, çав шутра чăвашсен те, унччен те пулнă, анчах юлашки 50 çулта питех палăрмастчӗ-ха.

ЮНЕСКО чăваш чӗлхине пӗтекеннисен йышне кӗртни тӗрӗсе тухса пырать ахăр. Енчен те ют регионсене, уйрăмах Мускавпа Санкт-Петербурга, çынсем çемйи-çемйипе куçса каяççӗ пулсан, унта вӗсем хăйсене чăваш теме пăрахаççӗ, ачисем пушшех те. Эппин, тепӗр çырав вăхăтӗнче чăвашсен шучӗ самай чакнинчен тӗлӗнмелле те мар пуль. (А.Наумов сăнӳкерчӗкӗ).