Çӗпрелӗнчи Хулаçырми вăтам шкул директорне Тутарстанри Халăхсен ассамблейин Тав çырăвӗпе чысларӗç

Ӗнер, февралӗн 27-мӗшӗнче, Хусанти А.С.Пушкин ячӗллӗ культура центрӗнче Тутарстанри Халăхсен ассамблейипе 2022-2032 ҫулсенче Тутарстан Республикинче тӗп халӑхсен чӗлхисен халӑхсен хушшинчи вунӑҫуллӑхне халалланӑ мероприятисене ирттерессипе йӗркелӳ комитечӗн пӗрлехи  ларӑвӗнче çак ӗçе активлă хутшăннисене наградăларӗç. Вӗсен хушшинче Çӗпрел районӗнчи Хулаçырми ялӗнчи «Мухтав» орденӗсен кавалерӗ Г.Т.Семенов ячӗллӗ вăтам шкул директорӗ Надежда Мокшина та пулчӗ. Тутарстанри халăхсен асамблейин Тав хучӗпе ăна ТР Патшалăх Канашӗн Председателӗ, Ассамблея ертӳçи Фарид Мухаметшин чысларӗ. 

Надежда Мокшина çемйипе пӗрле икӗ çул тăршшӗпе республика конкурсӗсене хутшăнчӗ. 2023 çулта «Эхо веков в истории семьи – Тарихта без эзлебез» конкурса, 2024 çулта «Нечкебил» çемье конкурсне хутшăннăччӗ. Иккӗшӗнче те чăваш халăхӗн культурине, йăли-йӗркисене тивӗçлӗ шайра кăтартрӗç Мокшинсем. Пӗрремӗш конкурсра зонăри тапхăрта иккӗмӗш вырăна тухрӗç. «Нечкебилта» вара финала çитсе Надежда Мокшина уйрăм номинаци çӗнтерӳçи пулса тăчӗ. Хăй ертсе пыракан шкулта та Надежда Федоровна тăван культурăпа чӗлхене упрассипе пысăк ӗçсем туса пырать. Ку ӗçре малашне те пысăк çитӗнӳсем сунатпăр.