П. ХУСАНКАЙ ПРЕМИЙӖ ӲСРӖ

«Сувар» хаçат юбилейӗн программинче çаплах ТР Çыравçисен союзӗн председателӗн Н.Сорокинăн «Свети, Мой млечный путь» кӗнекин хăтлавӗ те пулчӗ. Ăшă атмосферăра иртрӗ вăл. Кӗнеке авторӗ кӗскен содержанийӗпе паллаштарса Тутарстанра чăваш обществи 1990 çулсен пуçламăшӗнче çӗнӗрен мӗнле вăй илнине, çав шутра «Сувар» хаçат мӗнле йӗркеленнине аса илчӗ. Сăмах та çук, пулас ăрушăн кирлӗ кӗнеке. 

 «Сувар» хаçат çумӗнчи «Сунтал» литпӗрлешӳ те юбилей тӗлне тата тепӗр пысăк ӗç пурнăçланине палăртрӗç. «Шурăмпуç» журнал тухма тытăннăранпа 100 çул çитнине тата хаçатăн 25 çуллăхне халалласа «Шурăмпуçăн» 7-мӗш номерне кăларчӗ. Хусанти П.Хусанкай ячӗллӗ Чăваш наципе культура центрӗ республикăн чăваш çыравçисене П.Хусанкай ячӗллӗ литература премийӗпе чысласси йăлара. «Сунтал» литпӗрлешӳ 2018 çула пӗтӗмлетсе хальхинче Николай Андреева (Çӗпрел районӗнчи Çӗнӗ Йӗлмел) чи хастар çыравçă тесе йышăнчӗ. П.Хусанкай премине çак çамрăк çыравçă тивӗçрӗ те. Хусанти П.Хусанкай ячӗллӗ ЧНКЦ председателӗ Валерий Казаков ăна 10 пин тенкӗ парса чысларӗ (А. Наумов сăнӳкерчӗкӗ).