Олег Мустаева Ульяновск хулин Думине суйласшăн

Регионсенчи чăваш пӗрлешӗвӗсене ертсе пыракан депутатсен шучӗ кăçал тата ӳсес шанăç пур. Ульяновск хулин мэрне тин кăна суйланнă Сергей Панчин шучӗпе те акă, Хула Думинче пушаннă вырăна Ульяновск облаçӗнчи ЧНКА ертӳçи Олег Мустаев йышăнмалла тесе пӗлтернине хыпарлать 73online.ru сайт. Аса илтеретпӗр, Сергей Панчин июнӗн 15-мӗшӗнче Ульяновск мэрне суйлансан Хула Думин депутачӗн тивӗçӗсене пурнăçлама чарăнчӗ.

Çавна кура июнӗн 18-мӗшӗнче Хула Думинчи çак вырăна хушма суйлав (довыборы) кунне палăртнă. Вăл – июлӗн 8-мӗшӗ. Июлӗн 19-мӗшӗччен тӗп суйлав комитечӗ мандат претенденчӗсенчен документсем йышăнать. Мандат Область центрӗн парламенчӗн улттăмӗш пухăвӗччен икӗ çул вăйра пулать.

Июнӗн 2-мӗшӗнче «Единая Россия» партин хулари Атăл Леш енчи йӗркелӳ комитечӗ кандидатсен пирвайхи списокне çирӗплетнӗ. Унта кӗнӗ виçӗ çынран пӗри шăпах Олег Мустаев. Çак кунсенче 24-мӗш гимназире иртнӗ претендентсен дебатӗнче Сергей Панчин Мустаевшăн пулнине пӗлтернӗ.

Çапла вара Ульяновск хула Думине 15-мӗш номерлӗ пӗр мандатлă суйлав округӗнче «Единая Россия» партирен кандидатăн хушма суйлавӗ июлӗн 8-мӗшӗнче пулать. Çав кун ку тăрăхра виçӗ суйлав участокӗ ӗçлет. ( К.Малышев сăнӳкерчӗкӗсем).