Раççейре пӗрремӗш преми А. Леонтьевăн

Июнӗн 1-3-мӗшӗсенче Итали çӗршывӗнчи Пьемонт регионӗнчи Кунео провинцийӗнче миноритарлă чӗлхесен представителӗсене культурăпа искусствăн тӗрлӗ сферин халăхсем хушшинчи премине парса чысланине хыпарлать http://chgign.ru. Çак сумлă премие пуçласа пӗрремӗш хут Раççей çыннине, çитменнине чăваша панă. Раççей Журналистсен, Писательсен союзӗсен пайташӗ, Чăваш патшалăх гуманитари ăслăлăхӗсен институчӗн наука сотрудникӗ, нумай çул «Хыпар» Издательство çурчӗн ертӳçи пулнă Алексей Петрович Леонтьев «Куçару» номинацире çӗнтернӗ. Алексей Петрович А. Гринăн, А.Толстойăн, А.Беляевăн, М. Лермонтовпа Д.Лондонăн 100 ытла произведенине чăвашла куçарнă.

Чăвашсемшӗн ку чăнах та питӗ пысăк çитӗнӳ. 10 çулта премие тӗнчери мӗнпур континентран пурӗ те 31 лауреат кăна тивӗçнине шута илсен пушшех те. Алексей Петровича çак ятпа чӗререн саламласа тата пысăкрах çитӗнӳсем тума çирӗп сывлăхпа иксӗлми вăй-хал сунатпăр. ( Сăнӳкерчӗк http://chgign.ru сайтран).