«Çулталăк хӗрарăмӗ. Çулталăк арçынни: хӗрарăм куçӗпе» республика конкурсне чăваш хӗрарăмӗсем йышлăн хутшăнчӗç

Хӗрарăмăн обществори вырăнне хакласа пӗтерме те çук. Вăл анне, мăшăр, аппа-йăмăк, ӗçтеш кăна мар.  Хӗрарăм паян волонтер та, çар çынни те, наука ӗçченӗ те, бизнес-леди те, фермер та. Ку список вӗçӗмсӗр вăл. Çапах темле профессипе ӗçлесен те хӗрарăм çутçанталăк панă çепӗçлӗхпе, ырăлăхпа, чун çемçелӗхӗпе палăрса тăрать. Час-час  арçын вăйпа татса парайманнине шăпах хăйӗн черченлӗхӗпе татса парать.

Çӗршывпа республика аталанăвне те хӗрарăмсем пысăк тӳпе кӗртеççӗ. Вӗсем хушшинче тӗслӗхлӗ ӗçлекенсем питӗ нумай. «Çулталăк хӗрарăмӗ. Çулталăк арçынӗ: хӗрарăм куçӗпе» республика конкурсӗ те çавнах çирӗплетет.

Конкурс пӗтӗмлетӗвӗсене Пӗтӗм тӗнчери хӗрарăмсен кунӗ умӗн тăвасси тахçанах йăлана кӗнӗ. Кăçал торжествăлла церемони мартăн 4-мӗшӗнче «Корстон» суту-илӳпе хăна çурчӗн комплексӗнчи бал залӗнче иртрӗ. Уяв мероприятине асăннă конкурсра зона, республика тапхăрӗнче çӗнтернисем пуçтарăнса килнӗ. Хаклă хăнасене пурне те илемлӗ пуçтарнă кӗреке сӗтелӗ хушшине лартрӗç. Вӗсене саламлама патшалăх власть органӗсен, ведомствăсен, обществăлла организацисен представителӗсем килнӗ.

Республика ертӳçисен ятӗнчен хӗрарăмсене  ТР Патшалăх Канашӗн Председателӗ Фарид Мухаметшин саламларӗ. Парламент ертӳçи типӗ протокол чӗлхипе мар чӗререн тухакан ăшă сăмахсем каларӗ  хӗрарăмсене.

• Час-час сире лидер тивӗçӗсене хăвăр çине илсе тӗрлӗ сферăра кăткăс йышăнусем тума тивет: бизнесра, политикăра, патшалăх управленийӗнче, сывлăх сыхлавра, вӗрентӳре, культурăра тата ытти çӗрте. Сире йывăр ӗç те, пысăк яваплăх та хăратса тăмасть. Хуть мӗнле лару-тăрура та эсир инçекурăмлă пулса виçеллӗ йышăну тăватăр. Республикăн политика пурнăçне те активлă хутшăнатăр. Тавах сире ялан пирӗн çумра пулнăшăн», терӗ Фарид Мухаметшин.

Уяв мероприятийӗнче ятарлă çар операцийӗпе çыхăннă тема тӗп вырăнта пулчӗ. Залра гуманитари пулăшăвӗпе ӗçлекен волонтерсем, СВОна хутшăннисен, Раççей Геройӗсен амăшӗсем   йышлăччӗ. Çавсен шутӗнче Антонина Копунова (Алексей Копунов амăшӗ), Ленария Гилемханова (Дамир Гилемханов амăшӗ) пулчӗç. 

СВО теми тӗп вырăнта пулни «Çулталăк хӗрарăмӗ. Çулталăк арçынӗ: хӗрарăм куçӗпе» республика конкурсӗнче çӗнӗ «Уйрăм хисеппе» номинаци уçнинчен те палăрчӗ. Ку номинацире 36 лауреата палăртнă. «Хӗрарăм-лидер» номинацире те акă «Своиз не бросаем 16» проект йӗркеленӗ Анна Артемьева çӗнтерчӗ. «Çак ӗçе кӳлӗнме мана хамăр çӗршыва, республикăна, пире хӳтӗлекен атьсене юратни хутшăнма хистерӗ. Кунта эпӗ ăнсăртран çаклантăм пулӗ. Нумай хӗрарăм ман вырăнта пулма тивӗçлӗ», – терӗ сăпайлăн хăйне сăмах парсан.

Маттур чăваш хӗрарăмӗсем

Чăваш хӗрарăмӗсем те активлă хутшăннă çак конкурса. Хаклă хăна шутӗнче уяв мероприятийӗнче пулчӗç. Нурлат хулипе районӗн Туслăх Çурчӗн директорӗ, районти Чăваш наципе культура центрӗн председателӗ Галина Терентьева «Культура тата духовность» номинацире малтан район, унтан зона тапхăрӗнче çӗнтернӗ. Çак конкурса вăл маларах та 2014 çулта «Ман шăпа – ман професси» номинацире хутшăннă пулнă. Галина Владимировнăна пӗлмен чăваш сахал, республикăра кăна мар, ытти регионсенче те. Галина Терентьева икӗ хӗр амăшӗ. Вӗсем тивӗçлӗ çын пулса ӳсни уншăн чи пысăк çитӗнӳ. Иккӗшӗ те качча кайса çемьеллӗ пулнă. Асли Нурлатра пурăнать, журналист, «Нурлатский нефтяник» хаçатра ӗçлет. Кӗçӗн хӗрӗ Мускавра пурăнать. «Мана ачасемпе мăнуксен çитӗнӗвӗсем вăй параççӗ. Аслă мăнук ХФУра вӗренет, кӗçӗнни Мускаври художествăлла гимнастика шкулне çӳрет. Савăнатăп вӗсемпе», – тет Галина Владимировна. Çак ӗçчен хӗрарăма ӗç кăна пултăр. «Киле çывăрма кăна килеп», – шӳтлет вăл. Чăваш культурин аталанăвӗшӗн вăл чунне пама хатӗр.

 Çарăмсан районӗнчен иккӗн килнӗ. Лидия Квакова та чăваш тӗнчинче паллă çын. Республикăн культура аталанăвне, наци культурисен йăли-йӗркисене упрассине пысăк тӳпе кӗртнӗшӗн Акрель ялӗнчи культура çурчӗн заведующине  Лидия Дмитриевнăна ТР культурăн тава тивӗçлӗ ӗçченӗ ят панă. Обществăлла ӗçре те хастар – Çарăмсан районӗнчи Чăваш наципе культура центрӗн ӗçне йӗркелесе ертсе пырать. 2002 çултанпа Раççей çыравӗпе ӗçлет. Тӗп суйлав комитечӗн председателӗн тивӗçӗсене те пурнăçлать хастар хӗрарăм. Çавăнпа район, зона тапхăрӗсенче «Хӗрарăм-лидер» номинаци çӗнтерӳçи пулнинчен тӗлӗнмелли çук. Тата çакна та каласа хăвармалла:  Лидия Квакова сывă пурнăç йӗркине хисеплекен çын, упăшкипе Михаилпа вӗсем моржсен юхăмне йӗркелесе янă. Сивӗ шыва кӗме юратакансем ӗнтӗ. Пуçласа ушкăн 3-4 çынран тăнă пулсан халӗ Акрель моржӗсен шучӗ самай ӳснӗ, кӳршӗллӗ ялсенчен те çӳреме пуçланă ялти вакка.

Александра Ильдирякова та чыспа хисепе тивӗç хӗрарăм. Сăмах май, вăл та моржсен юхăмӗнчен. Ун пеккисем пирки çунакан пӳрте те кӗрет, ӗрӗхсе чупакан лашана та чарать теççӗ. Александра Григорьевна 5 ача амăшӗ, тăватă ывăлпа пӗр хӗр çуратса ӳстернӗ, паяна 5 мăнук. Кӗрӗвӗ хальхи вăхăтра ятарлă çар операцийӗнче Тăван çӗршыва хӳтӗлет. Хăшӗ пӗр ачапа та ӗлкӗрсе пыраймасан Александра Григорьевна нумай ачаллă пулин те пур çӗре те ӗлкӗрет. Çӗнӗ-Йӗлмел ял хутлăхӗн пуçлăхӗн çумӗ, Культура çурчӗн заведующийӗ пулса ӗçлет. Вырăнти хăйтытăмлăх депутачӗ пек ялти чылай ыйтăва татса парассипе те нумай вăй хурать. Конкурса вăл «Хӗрарăм-анне» номинаципе хутшăнса район, зона тапхăрӗсенче çӗнтернӗ.

Вăт çапла пирӗн маттур та пултаруллă чăваш хӗрарăмӗсем. Конкурса мӗншӗн хутшăнтăр тесе ыйтсан: «Чăваш хӗрарăмӗсем те республика пурнăçне активлă хутшăннине палăртас, ун ыр ятне хӳтӗлес тӗллевпе. Хамăра кăтартас, мăнаçланас тесе мар, çӗршер чăваш хӗрарăмӗ ятӗнчен пултăр терӗмӗр. Чăваш хӗрарăмӗсем вӗсем пурте питӗ те маттур, пултаруллă», – терӗç. Конкурса хутшăннă ытти чăваш хӗрарăмӗсем те пурччӗ пулӗ залра. Шел те, пуринпе те паллашма май пулмарӗ.

Чыс та хисеп ветерансене!

Кăçал аслă Çӗнтерӗвӗн 80 çулне паллă тунă май Тăван Çӗршывăн аслă вăрçин ветеранӗсемпе тыл ӗçченӗсене, вăрçă ачисене те пысăк тимлӗх уйăрнă. «Арçын-лидер» номинаци çӗнтерӳçисене ТР Обществăлла палата председателӗ Зиля Валеева чысларӗ. Çавсен хушшинче СВОна нумай пулăшу паракан ТР Патшалăх Канашӗн депутачӗ Руслан Нигматуллин, «Урал» ял хуçалăх кооперативӗн пуçлăхӗ Газинур Хабибрахманов пулчӗç. «Пархатарлă чӗре» номинаци çӗнтерӳçисене халăх ура çине тăрса темӗнччен алă çупса саламларӗ. Çапăçу ветеранӗн Ильнур Яруллинăн (афган вăрçин ветеранӗ) çак кун шăпах çуралнă кунӗччӗ те. Вăл СВО пуçланнăранпа  передовойне тăтăшах гуманитари пулăшăвӗ леçме çӳрет, ывăлне те хăйпе илет.

Тюлячи районӗнче пурăнакан Алексей Писарев вăрçă ветеранӗ, 99 çулпа пырать. «Хамăрăн атьсене çӗнтерӳпе ырă-сывă таврăнма пиллетӗп», – терӗ ветеран куççульне шăлса.

Рукия Сахабутдинова та вăрçă хăрушлăхне хăй куçӗпе курнă, тӳссе ирттернӗ. Вăл Ленинград блокадине чăтса ирттернӗскер, вуннăдра пулонă ун чухне. 93-ри хӗрарăм калавӗ пурне те чӗререн хумхантарчӗ. «Виççӗмӗш çул ӳсӗмӗн героини» номинаци çӗнтерӳçи  Анат Кама хулинче пурăнать.  

Конкурсра ветерансене чыслани питӗ те вырăнлă та тӗрӗс. Вӗсем-çке пире мирлӗ пурнăç парнеленӗ.

Çак уяв мӗнпур хӗрарăмшӗн мартăн 8-мӗшӗ умӗнхи парне пулчӗ.  

Ирина ТРИФОНОВА.

Сăнӳкерчӗксем https://gossov.tatarstan.ru сайтран.