Кăçал Шупашкарта-тăк, тепӗр çул Аксура чей ӗçӗç

Тутарсен Федераци шайӗнчи Сабантуйӗ кăçал июлӗн 6-7-мӗшӗсенче кӳршӗре – Чăваш Енӗн тӗп хулинче Шупашкарта (Хӗрлӗ тӳремре тата заливри  Анне палăкӗ умӗнче) кӗрлерӗ. Наци уявне тутарсем 41 регионтан килсе çитрӗç.  Тутарстанпа Чăваш Енрен пурӗ пине яхăн пултарулăх ушкăнӗ илем кӗртрӗ ăна. 

Кӗрешӳ кавирӗ çине Сабантуйăн тӗп парнисемшӗн – такапа çăмăл машинăшăн – чи вăйлă 80 кӗрешӳçӗ тухрӗ. Çапла тӗп трофей – така – Марий Эл паттăрне Муса Галямова лекрӗ пулсан, çăмăл машинăна  Чăваш Ен паттăрӗ Ринас Садаров вӗçертмерӗ. Калфак-тӳпеттей тăхăннă çакăн чухлӗ çынна Шупашкар хальччен курманччӗ-тӗр-ха.

Сăмах май, тӳпеттейпе тутар чекменӗ халӗ Чăваш Ен Пуçлăхӗн Михаил Игнатьевăн та пур. Сабантуйпа йăхташӗсене саламлама килнӗ ТР Президенчӗ Рустам

Минниханов ятарласах парнелерӗ ăна. Çапла майпа  федераци Сабантуйне Шупашкарта ирттернӗшӗн тав турӗ вăл. Çитес çул Тутарстанри чăвашсен Уявне Рустам Минниханов та шупăрпа килессе шанатпăр. Мӗншӗн тесен чăвашсем хăйне те шупăр тăхăнтарчӗç вӗт. Рустам Нургалиевич Чăваш Ен Пуçлăхне Михаил Игнатьева çитес çул Тутарстанри Уява килме йыхравларӗ.

Федераци Сабантуйӗ иртнӗ кунри тепӗр пулăма та палăртмалла. ЧР Президенчӗ Михаил Игнатьев хăйӗн ӗçтешне, ТР Президентне Рустам Минниханова, туслăха тата килӗштерсе ӗçлеме пысăк тӳпе хывнăшăн «Чăваш Республики умӗнчи тава тивӗçлӗ ӗçсемшӗн» орденпа чысларӗ.

Çапла хаваслă та шавлă иртрӗ кӳршӗре Федерацин 18-мӗш Сабантуйӗ. Çитес çул федераци Сабантуйне Коми Республикин тӗп хули Сыктывкар йышăнать. Чăваш Енри тутарсен представителӗсем федераци  Сабантуйӗн символне «Тулпара» Коми Республикин представителӗсене пачӗç. (Сăнӳкерчӗксем www.cap.ru сайтран).