Владимир Степанов Хĕр пĕркенчĕкĕ Мистикăлла калав
Çывăрма выртас умĕн лăпкă çанталăкпа кăштах киленсе илес тесе балкон çине тухса тăтăм. Ыран – шăматкун, ирех вăранмалла мар, ниçта та васкас çук. Каçхи хула хунар çутисен шăрçи-тенкине çакнă, çӳллĕ çуртсен куçĕсем çутăпа тулнă. Темĕн пысăкăш сарă уйăх пĕлĕтелле кармашать. Тӳлек те лăпкă ăшă каç тăрать – юрăри пекех. Хура тӳпере темĕнле ăнланмалла мар мĕлке палăрма пуçланине асăрхарăм сасартăк. Тата мĕн амакĕ куçа курăнать?
