Теччӗ районӗнчи Аслă Ăнă ялӗнче Н.М.Сорокинăн асăну каçӗ иртрӗ
Паллă журналист, публицист, çыравçă, ТР тата Раççей культурăсен тава тивӗçлӗ ӗçченӗ, ТР ЧНКА çумӗнчи Чăваш çыравçисен союзӗн 2013 – 2021 çулсенчи председателӗ, «Сувар» хаçата никӗслекенӗ, иккӗмӗш редакторӗ Николай Михайлович Сорокин пултарулăхӗ нумай енлӗ. Республика хаçачӗсенче, ТАССăн Тутарстанри корреспондентӗнче нумай çул ӗçленӗскер публицистика, литература жанрӗсемпе пуринпе те çăмăллăн çыратчӗ. Çакна пулас ăрусем валли хăварнă 13 кӗнеки, çав шутра «Аттеçӗм Атăл», «Тăлăх арăм минтерӗ» романӗсем, кăтартаççӗ. Николай Михайлович пурăннă пулсан кăçал июлӗн 8-мӗшӗнче 81 çул тултармаллаччӗ. Шел, пӗлтӗр хăйӗн 80 çулхи юбилейӗччен 3 кун пурăнса çитеймерӗ вăл, июлӗн 5-мӗшӗнче ӗмӗрлӗхе куçне хупрӗ. Кăçал çак кун тăван ял-йыш çывăх çыннисемпе, Тутарстанри, Ульяновск облаçӗнчи çыравçăсемпе, Теччӗ тата Пăва ЧНКЦ хастарӗсемпе пӗрле асăну каçне ирттерчӗç.
