«Пирӗн ывăлсене сума сунăшăн тав», – терӗç салтаксен ашшӗ-амăшӗсем Аксу районӗнче иртнӗ кӗнеке хăтлавӗнче
Декабрӗн 12-мӗшӗнче «Сувар» хаçат журналисчӗн Ирина Кузьминан «Ангел малта, эпир ун хыççăн» кӗнекин хăтлавӗ виççӗмӗш хутчен иртрӗ. Хальхинче Аксу районӗнчи Саврăшпуç ялӗнче. 11 сехет çитнӗ çӗре Саврăшпуçӗнчи Культура çуртне халăх йышлăн пухăнчӗ. Салтаксен ашшӗ-амăшӗсем, тăванӗсем, ял-йыш, Аксури, Саврăшпуçӗнчи тата тавра ялсенчи волонтерсем, шкул ачисем, çар ветеранӗсем, район администрацийӗн представителӗсем, чăваш центрӗсен ертӳçисем, юнармеецсем, шкул ачисем пуçтарăнчӗç. Çавăн пекех ку хăтлава Чистай, Çӗнӗ Шуçăм, Нурлат тата Çарăмсан районӗсенчи салтаксен тăванӗсене те чӗнтӗмӗр.
