СЕМЕН КОНОВАЛОВ ЧĂВАШ е ВЫРĂС?

«... Хамăрăн çунса кӗленнӗ комбинезонсем çийӗн нимӗçсен мундирӗсене тăхăнса ятăмăр. Нимӗç танкӗсемпе эпӗ Саратоври бронетанк училищинче вӗреннӗ чухнех паллашнă. Трофея хăвăрт алла илсе çула тухрăмăр...» – çапла аса илет Семен Коновалов вăрçăра кăтартнă паттăрлăхӗн саманчӗсене.

Нумай пулмасть Раççей кинопрокатне К.Максимовăн «Несокрушимые» кинофильм тухрӗ. Ăна пирӗн паттăр ентешӗмӗрӗн, СССР Геройӗн Семен Коновалов паттăрлăхне халалласа ӳкернӗ. Вăл ертсе пыракан танк экипажĕ пӗччен нимӗçсен танк дивизине хирӗç тăрать. Каласан ӗненме йывăр, анчах ку чăннипех çапла пулнă. «Википедия» сайтӗнче те Семен Коновалов пирки çырни пур, кино тухиччен унта нацие кăтартакан сыпăкра «чăваш» тесе çырнăччӗ, анчах кино пысăк экран çине тухнă хыççăн такам «вырăс» тесе тӳрлетсе хунă. Мӗн тӗллевпе? Ăнланма çук. Кино проката тухнă хыççăн çынсем иккӗленме пуçларӗç. Чăнах, Семен Васильевич чăваш е вырăс? Коновалов чăнах та чăвашах пулнине ӗнентерес шутпа «Сувар» хаçат ӗçченӗсем эпир Семен Васильевич Коновалова лайăх пӗлекен, унпа тӗл пулнă çынсене шырарăмăр. Вӗсенчен пӗри ТР Чăваш çыравçисен союзӗн председателӗ Николай Сорокин пулса кайрӗ. Совет Союзӗн Геройӗпе вăл ТАСС корреспонденчӗ пулса ӗçленӗ вăхăтра курса калаçнă. «Несокрушимый» кинори паттăрлăх çинчен танкист журналиста 1982 çулта каласа панă иккен. Н.Сорокинăн çав историлле тӗлпулăвӗпе «Сувар» хаçатăн çӗнӗ номерӗнче паллашăр. (С.Коноваловсен çемье архивӗнчи сăнӳкерчӗксем).