Тутарстанри Чӑваш хӗрарӑмӗсен союзӗ Хусанта уяв умӗн пуҫтарӑнчӗ
Пӗтӗм тӗнчери хӗрарӑмсен кунӗ умӗн Тутарстанри Чӑваш хӗрарӑмӗсен союзӗн активисчӗсем парне айне пулчӗҫ тесен те йӑнӑш мар.
Ӗнер, мартӑн 6-мӗшӗнче, Тутарстанри Чӑваш хӗрарӑмӗсен союзӗн правленийӗ Пӗтӗм тӗнчери хӗрарӑмсен кунӗ умӗн чаплӑ уяв ирттерсе Союзра тӑракан хӗрарӑмсене саламларӗ.
Мероприятие пӗрлешӗвӗн Ҫӗпрел, Элмет, Нурлат, Ҫӳлту, Ешӗлвар районӗсенчи тата Хусан хулинчи центрӗсенчен килсе ҫитрӗҫ. Чи пысӑк йышпа ҫӗпрелсем хутшӑнчӗҫ. Ҫак ушкӑнра пурте тенӗ пек шкул директорӗсем. Ку лайӑх та, мӗншӗн тесен Союзӑн тӗп тӗллевӗсемпе задачисенчен пӗри вӑл - тӑван чӗлхене упрасси, аталантарасси. Вӗрентекенсен вара ӑна пурнӑҫлама мӗнпур ресурссем пур.
Нурлатпа Ешӗлвартан та вӗрентӳ сферинчи ҫынсем килнӗччӗ. Тепӗр ҫурри культура тата бизнес сферинчен.
Уява Тутарстанри Чӑваш хӗрарӑмӗсен союзӗн председателӗ Сильвия Чаркина ертсе пычӗ, ӑна пулӑшаканӗ чӑваш ҫамрӑкӗсен "Аталан" пӗрлешӗвӗн хастарӗ Дмитрий Мясников пулчӗ.
Сильвия Чаркина хӗрарӑмсене ҫывхарса килекен праҫникпе саламласа пӗлтӗрпе кӑҫалхи пӗрремӗш уйӑхсенче пурнӑҫланӑ ӗҫсемпе паллаштарчӗ.
Ун сӑмахӗпе, Союз республикӑра иртекен мероприятисемпе наци праҫникӗсене, социаллӑ проектсене активлӑ хутшӑнать. 2025 ҫул Раҫҫейре Тӑван ҫӗршыв хӳтӗлевҫисен ҫулталӑкӗ пек иртнинче, Ӑслӑ Ҫӗнтерӗвӗн 80-ҫуллӑхне паллӑ тунине палӑртса хӗрарӑмсен пӗрлӗхӗ СВОна хутшӑннисене тӗрев парса гуманитари пулӑшӑвне пухассипе ӗҫлекен волонтерсемпе тачӑ ҫыхӑнса ӗҫленине каларӗ. Ҫулталӑк пуҫламӑшӗнчен ку ӗҫ активлӑ пырать. Ҫак кунсенче кӑна Союз укҫа пуҫтарса эмелсем илнӗ. Часах ӑна передовойӗнчи салтаксене леҫеҫҫӗ.
Тепӗр пысӑк ӗҫ - Союзри хӗрарӑмсем республикӑра иртекен социаллӑ конкурссене хутшӑнни. Ҫавсен хушшинче Надежда Мокшинӑна, Наталья Клементьевана палӑртрӗ.
- Эсир чӑваш хӗрарӑмне чи ҫӳллӗ шайра тивӗҫлӗ кӑтартрӑр. Сире пӑхса чӑваш хӗрарӑмсене хаклаҫҫӗ. Пысӑк тав сире, - терӗ Сильвия Чаркина.
Союз председателӗн ҫумӗ Ирина Порфирьева ку йышши мероприятисем кирлине каласа пӗрлешӗвӗн ӗҫне вӑйлатса ун йышне пысӑклатмалли, унта ҫамрӑксене те илмелли, социаллӑ усӑллӑха ӳстермелли ҫинче пусӑм турӗ.
Тутарстанри Чӑваш хӗрарӑмӗсене Чӑваш Ен хӗрарӑмсен союзӗн председателӗ Наталья Николаева саламлани пысӑк парне пулчӗ. Ун саламне Сильвия Чаркина ҫитерчӗ. Вера Юнусова вара Наталья Николаеван парнине ҫитерекенни пулчӗ. Шурӑ роза чечекӗсене ун ятӗнчен пурне те салатса пама ыйтрӗ.
Савӑннӑ хӗрарӑмсем ҫийӗнчех Наталья Алексеевнӑна видео-салам туса ҫуралнӑ кунпа тата Мартӑн 8-мӗшӗпе саламларӗҫ.
Пысӑк тав сӑмахӗсем ТР Чӑваш наципе культура автономийӗн председательне, ТР Патшалӑх Канашӗн депутатне Дмитрий Самаренкина та калаҫҫӗ союзрисем. Дмитрий Самаренкин кашнине мӑшӑр чей куркипе хӑй ертсе пыракан Ҫу комбиначӗн продукцине парнелерӗ. Ун енчен тимлӗх пурри пурне те малашне тата активлӑрах ӗҫлеме хавхалантарчӗ. Дмитрий Самаренкина тата СВОна хутшӑннисене тав туса видео-салам ҫырса ячӗҫ пикесем.
ТР ЧНКА Канашӗн председателӗн ҫумӗ Константин Малышев хӑй килсе саламлани те ырӑ самант пулчӗ. Пурне те ҫывхарса килекен праҫникпе саламласа ырлӑх-сывлӑх сунчӗ.
Уява илем кӳрекенни "Ӗмӗт" этно-ушкӑн ертӳҫи Анжелика Еремеева пулчӗ. Ун юррисем пурин кӑмӑлне те ҫӗклерӗҫ.
Союз хӗрарӑмӗсем хӑйсем те маттур - Вера Юнусова та чӑвашла юрӑ парнелерӗ.
Мероприяти Союз председателӗ Сильвия Чаркина иртнӗ ҫулта ӗҫре активлӑ палӑрнисене Тав хучӗпе чысланипе вӗҫленчӗ. Ҫавсен шутӗнче Вера Юнусова, Наталья Клементьева, Надежда Мокшина, Татьяна Яковлевна тата мероприятие ирттерме пулӑшнӑ Дмитрий Мясников пулчӗҫ.
Следите за самым важным и интересным в Telegram-каналеТатмедиа
Нет комментариев