Турхан Энтрин тумхахлă çулӗ
Чăваш çыравçи, тӗпчевçӗ, ăсчах Геннадий Федорович Юмарт палăртнă тăрăх, «… Турхан Энтри тăван литературăна хывнă тӳпе хрестоматие кӗнӗ чылай авторсеннинчен çӳллӗрех, пултарулăхӗ пуянрах тата сулмаклăрах. Сăвăсем çырма вăл 1904 çултах, Хусанти учительсен семинарийӗнче вӗреннӗ вăхăтрах, тытăннă. Çакăн хыççăн прозăпа та кăсăкланнă, куçарусем тунă. Вӗсенчен хăш-пӗрисем «Хыпар» (1917) хаçатра, «Сунтал», «Ӗçлекенсен сасси» журналсенче тата ытти изданисенче пичетленнӗ». Кунсăр пуçне 1917 çулта Хусанта чăвашла тухса тăнă «Хыпар» хаçатăн темиçе номерӗнче «Чăваш историйӗ» историлле очерк пичетленсе пынă.
