Нина Царыгина: «Кӗнекесем мана ӗмӗтленме вӗрентрӗç»
«Сувар» вулаканӗсем Нина Царыгинан ятне илтнех. Пирӗн пата çырса тăракан Чăваш кӗнеке издательствин редакторӗсем Ольга Федоровăпа Ольга Иванова хăйсен статйисенче час-час аса илеççӗ çамрăк çыравçă тата журналист пирки. Чистай районне кӗрекен Анат Кăтрата ялӗнче çуралса ӳснӗ хӗрӗн сăвви-калавӗ шкул çулӗсенчех «Тантăш», «Школьники постарше» хаçатсенче пичетленнӗ. И. Н. Ульянов ячӗллӗ Чăваш патшалăх университетӗнче пӗлӳ илнӗ вăхăтра «Хресчен сасси», «Çамрăксен хаçачӗ» кăларăмсемпе çыхăну тытнă. Хайлавӗсем «Кӗтмен юрату», «Çӗршывăмçăм, Чăваш çӗршывӗ. Чувашия родная», «Пирӗшти патне янă çыру», «Çул кайăкӗ» коллективлă сборниксенче, «Тăван Атăл» журналта кун çути курнă. Нина Царыгина — Чăваш Республикинчи Профессиллӗ писательсен союзӗн пайташӗ (2021). Халӗ вăл — «Хыпар» хаçатăн социаллă пурнăç, культура тата спорт пайӗн редакторӗ.
