Матак каччи Юрий Мидюкин виçӗ çул тăшманпа кӗрешет
Çын ӗмӗтсӗр пурăнмасть. Пӗри вӗрентекен, тепри тухтăр, виççӗмӗшӗ инженер, водитель е Тăван çӗршыва хӳтӗлеме ӗмӗтленсе çар çынни пуласшăн. Чи вăйлисемпе телейлисем кăна йывăрлăхпа чăрмавсене çӗнсе ӗмӗте пурнăçлаяççӗ. Хăш чухне çынсемпе калаçнă май Николай Островскин «Как закалялась сталь» романӗн тӗп геройӗн Павел Корчагинăн шăпи аса килет. Кама-тăр унпа танлаштарни тӗрӗс мар, анчах унăнни пек шăпа пиртен кашнин пулма пултарать. Сăмахăм ятарлă çар операцине хутшăнакан Юрий Анатольевич Мидюкин çинчен. Унăн историйӗ те Павел Корчагинăнни пек пурнăç хавалӗпе, идеалсене парăнса çӗнӗ пурнăçшăн кӗрешессипе çыхăннă.
