Сарă арбуз
Хулара пурăнатпăр пулсан та пирӗн çурт умӗнче пӗчӗк пахча пур. Унта тем те ӳстерме пулать. Кишӗр, хăяр, сухан... Выляма кайиччен кашни каç пӗчӗк лейкăпа шăваратпăр. Лайăх ӳсеççӗ. Парка çитӗнеççӗ. Ӗнтӗ кишӗрӗ кача пӳрне хулăнăш пулнă. Анне сайратса парать те кăчăртаттаратпăр вара хыçалти шăлсемпе аран-аран. Малти шăлсем тӗпренсе пӗтнӗ. Арбуз ӳстересчӗ кунта. Ăна çиме шăл кирлӗ мар. Сарă тӗслине. Конфет пек пылаккине. Пулать-ши ун пекки?
