«Сувар» хаçатăн çывăх тусӗ Альберт Кольцов 85 çул тултарчӗ
«Сувар» хаçатăн чи çывăх тусӗсенчен пӗрне Альберт Кольцова пирӗн вулакансенчен нумайăшӗ аван пӗлет. Альберт Миронович 2001 çултанпа редакципе тачă çыхăну тытать: килсе çӳрет, хаçата статьясем çырать, кӗнекесем кăларать. «Хусанта тухса тăракан „Сувар“ хаçатпа туслашсан хам та çырма пуçларăм», — тет ӗмӗр тăршшӗпе строительство енӗпе тăрăшса ӗçленӗ хисеплӗ ватă. Альберт Мироновича итлеме хуть хăçан та интереслӗ, мӗн кăна пӗлмест вăл. Унпа мӗнле темăпа калаçу пуçарсан та тем те каласа парать Лайăш районӗнчи Аслă Кабанра пурăнакан, çак кунсенче 85 çул тултаракан шурсухал.
