Хусан 17 томлă чăваш словарӗн авторне асăнчӗ

Раççей чӗлхеçи, тюркологӗ, 40 пин сăмахлă 17 томлă чăваш словарӗн авторӗ Николай Иванович Ашмарин çуралнăранпа паян, октябрӗн 4-мӗшӗнче, 150 çул çитрӗ. Юбилее хусансем Ар масарӗнче митинг ирттерсе паллă турӗç. Унта ТР ЧНКА ӗçченӗсем, ТР ЧНКА çумӗнчи Чăваш çыравçисен союзӗн председателӗ Н.Сорокин, Тутарстанри чăваш таврапӗлӳçисен пӗрлӗхӗн ертӳçи А.Семенов, Хусанта пурăнакан В.Секанкин, Çарăмсан районӗнчи Журавлев чăваш хастарӗсем тата Хусанти тюрколог А.Галимзянов хутшăнчӗç. Вăхăтӗнче Хусанта ӗçленӗ, кунти Ар масарӗнче ӗмӗрлӗхе канлӗх тупнă чӗлхеçӗн ӗçне пухăннисем пысăка хурса хакланине, чăвашсем валли кăна мар, Атăлçи тăрăхӗнчи ытти халăхсем валли те калама çук пысăк пуянлăх – 17 томлă словарь, тӗпчев ӗçӗсем – хăварнине, тюркологсем вӗсемпе паян та анлăн усă курнине каларӗç.

Чăваш таврапӗлӳçи А.Семенов пӗлтернӗ тăрăх, Николай Кондрашкин скульптор Н.И.Ашмаринăн бюстне хатӗрленӗ ӗнтӗ, Хусан влаçӗ те Ар масарне ларттарма хирӗç мар. Анчах ку ӗçе пурнăçлама сахалтан та 100 000 тенкӗ укçа кирлӗ. Чăваш Ен 50 000 тенкӗ уйăрма шантарать. Тепӗр 50 000 тутарстансем хăйсем пухма йышăнчӗç митингра. Çитес вăхăтра çак ырă ӗç валли ятарлă шут уçӗç. Кăмăл пуррисем пурте укçа куçарма пултараççӗ. Чăрмавӗ укçара кăна мар иккен-ха тата. Н.И.Ашмаринăн бюстне лартмашкăн чӗлхеçӗн тăванӗсен ирӗкӗ кирлӗ. Вӗсемпе хальлӗхе çыхăнăва тухман-ха, мӗншӗн тесен ăçта пурăннине пӗлмеççӗ. Тен, икӗ регион чăвашӗсен ырă ӗçӗ пирки пӗлсен вӗсем хăйсене нумай кӗттермӗç, çыхăнăва тухӗç. Бюста кăçалах Н.И.Ашмаринăн 150 çулне халалласа вилтăпри çине лартасшăн (И.Трифонова сăнӳкерчӗкӗсем).