Хусанти Вырăс çамрăксен театрӗ 92-мӗш театр сезонне ура çинчех ирттерет
А.Островский урамӗнчи 10-мӗш çуртра тахçантанпа кӗтнӗ юсав ӗçӗсем пыраççӗ, труппа вара куракана нимӗн пулман пек яланхилле спектакльсемпе савăнтарать, премьерăсем хатӗрлет. Енчен те юсавччен спектакльсемпе тӗп сценăран пит аякка кайман-тăк (трамвай çинчи, Хусан урамӗсенчи иммерсивлă спектакльсене шута илмӗпӗр), халӗ вара хулари 47 площадкăра Вырăс çамрăксен театрӗн постановкисене пăхма пулать. Хулари театрсенче, Культура çурчӗсенче, шкулсенче. Театр çуртне реконструкци тума пуçланăранпа труппа 298 хутчен спектакльсемпе тӗрлӗ сцена çине тухнă. Республикăпа та, Раççейӗпе илсен те тӗрлӗ çӗре çитме ӗлкӗрнӗ артистсем.
