Чăваш кӗнеке издательстви 105 çул тултарнине уявларӗ
Чăваш кӗнеке издательстви – Чăваш автономийӗн тантăшӗ – чӳк уйăхӗн 12-мӗшӗнче 105 çул тултарчӗ. Ăна РСФСР Патшалăх издательствин Чăваш уйрăмӗ пек уçнă /Чăвашгиз/. Малтанхи вăхăтра унта кӗнекесем çеç мар, хаçат-журнал та кăларнă. Ытларах вӗренӳ, обществăпа политика, ăслăлăх кӗнекисем пичетленӗ. Вăрçă çулӗсенче çар тематикине пысăк тимлӗх уйăрнă. 1963 çулта Чăвашгиз Чăваш кӗнеке издательстви пулса тăнă, кăларăмсен йышӗ чылай ӳснӗ, ача-пăча тата илемлӗ литература пысăк вырăн йышăнма пуçланă, ял хуçалăх, вӗренӳпе педагогика тата ытти кӗнекесем, альбомсем пысăк тиражпа тухнă. Тӗрлӗ çулта кунта паллă чăваш поэчӗсемпе прозаикӗсем вăй хунă: Ухсай Яккăвӗ, Леонид Агаков, Василий Алендей, Илпек Микулайӗ, Степан Лашман, Çемен Элкер, Хветӗр Уяр, Куçма Турхан, Василий Давыдов-Анатри, Юрий Сементер тата ыттисем те.
