Вăрçăра паттăрлăх кăтартнă ветеранăн ырă ячӗ ял çыннисен асне яланлăхах кӗрсе юлнă
Тăван çӗршывăн Аслă вăрçи чарăннăранпа кăçал 80 çул çитрӗ. Ку историре питӗ пысăк пӗлтерӗшлӗ пулăм ячӗпе 2025 çула Раççей Федерацийӗн Президенчӗ В.В.Путин Тăван çӗршыв хӳтӗлевçин çулталăкӗ тесе пӗлтерчӗ. Çӗршывăн пур кӗтесӗнче те çак ятпа çулталăкӗпех мероприятисем иртеççӗ. Паянхи кун Аксу районӗнчи Кивӗ Ӳселӗнче 1939 – 1945 çулсенчи хаяр вăрçăсене хутшăннă ветерансем юлмарӗç ӗнтӗ. Эпир вӗсене яланах асра тытатпăр. Вăрçăран сывă таврăннă салтаксене те малтанхи çулсенче çăмăлах пулман. Вӗсем вăрçă çулӗсенче юхăннă хуçалăха çӗнетсе ура çине тăратнă çӗрте ырми-канми ӗçленӗ. Колхозри ӗне, сысна, сурăх, лаша, чăх-чӗп витисене çӗнӗрен туса лартнă. Тырпул туса илес, выльăхсене пăхас çӗрте вăй хунă. Ялти шкула çӗнетнӗ, ун çумне тата пилӗк класс вӗренмелӗх пурасем хăпартса лартнă, хăмапа витнӗ, ялта çӗнӗ клуб тунă. Пӗренесене вăрмантан лашасемпе, вăкăрсемпе турттарнă. 1949 çулта, ял-йыш тăрăшса ӗçленипе, Аслă Сӗнче юханшывӗ çинче колхоз гидроэлектростанцине хута янă. Ку ӗçсенче пирӗн кӳршӗре пурăнакан вăрçă ветеранӗ Кӗçтюк пичче те хастаррăн ӗçленӗ…
