П.В.Дементьев музейӗнче Çӗнӗ Упири тӗп шкулта вӗренекенсем хутшӑннипе «Атӑлçи халӑхӗсен наци тумӗсен тӗнчинче» музей урокӗ иртрӗ.
Раççейри халӑхсен пӗрлӗхӗн çулталӑкне халалланӑскере çулçӳрев евӗр йӗркелерӗмӗр. Ачасем Атӑлçи тӑрӑхӗнче пурӑнакан халӑхсен наци тумӗн уйрӑмлӑхӗсемпе паллашрӗç. Тумтир çыннӑн пурнӑç йӗркине, йӑлисене, социаллӑ лару-тӑрӑвне те мӗнле кӑтартса панине пӗлчӗç.
Занятире чӑваш тумӗ çине уйрӑмах тимлӗх уйӑрчӗç – шкул ачисем хӗрсем тăхăнакан тухьяна тата йӑлана кӗнӗ тумӑн ытти элеменчӗсене курчӗç, эрешсемпе материалсен пӗлтерӗшне тишкерчӗç.
Программӑна экспонатсене кӑтартасси, халӑх тумӗн тӗслӗхӗсемпе видеохăтлав тата ыйтусене сӳтсе явасси кӗчӗ. Ачасем хăйсен шухӑш-кӑмӑлӗсенче халӑхсен тумӗсем кашни тӗрлӗрен, уйрӑмлӑхӗсем урӑхлараххи, анчах пӗр пекех илемлӗ пулнине палӑртрӗç.
Çакӑн пек уроксем шкул ачисене тӑван тӑрӑхри культура нумай енлӗхне лайӑхрах ӑнланма, ӑрусен çыхӑнӑвне туйма, тӗрлӗ халӑхсен йӑли-йӗркине хисеплеме пулӑшаççӗ.
Юрий АДЪЮТАНТОВ.
Çӗпрел районӗ,
Çӗнӗ Упи.
Автор сăнӳкерчӗкӗсем.
Нет комментариев