Сиктӗрмере Çурхи Микула кунӗнче I православи фестивалӗ иртрӗ
Майăн 22-мӗшӗнче, Çурхи Микула кун, Элкел районӗнчи Сиктӗрмере кунта халиччен пулман праçник пулчӗ — пуçласа православи фестивалӗ иртрӗ. Николай Чудотворец Мир Ликийский святитель ячӗллӗ «Ӗненӳ. Çемье. Тăван çӗршыв» (Вера. Семья. Отечество) I православи фестивалӗ Элкел муниципаллă районӗн администрацийӗ, вырăнти «Хузангаевский» тулли мар яваплăхлă общество, ТР Чăваш наципе культура автономийӗ, Элкел районӗнчи Чăваш наципе культура центрӗ тăрăшнипе, Чистай тата Анат Кама епископӗ Пахомий пил панипе питӗ çӳллӗ шайра иртрӗ.
