News by date 9 October 2023
-
5 пин тенкӗшӗн тӗрмене
Октябрӗн 5-мӗшӗнче çӗрле Куйбышев чугун çулӗн Пӗкӗлме станцийӗнчи реле шкапне вут чӗртнӗ 20, 21 тата 16 çулти виçӗ çамрăкăн хăйсен хăтланăвӗ çинчен шухăшламалăх вăхăт ытлашшипех халӗ, вӗсене «Терроризм» статьяпа айăпласа çитес 20 çула тӗрмене хупма пултараççӗ.
-
Францире чăвашла юрлать
Октябрӗн 8-мӗшӗнче Пӗкӗлме хулинчи «Дом техники» Культура çуртӗнче Галина Михайловна Таймасован пултарулăх каçӗ иртрӗ. 16 çул Францире пурăнакан ентешӗмӗр (унти чăвашсен «Аван-и?» пӗрлешӗвӗн йӗркелӳçисенчен пӗри) Галина Таймасова Европăра чăваш культурине аталантарас, унпа тӗнчене паллаштарас ӗçе илсе пырать. Хăйех юрлать, юрăсем çырать, халӗ акă «От Наратлов до Лоррена» кӗнеки те тухрӗ. Автобиографилле кӗнекинче автор хăйӗн йăх-несӗлӗ, çемйи тата тăван енӗ çинчен çырать.
-
Бензин хакӗ чакнă
РФ премьер-министрӗпе Михаил Мишустинпеа иртнӗ тӗлпулура Раççей вице-премьерӗ Александр Новак çӗршывăн 81 регионӗнче бензин тата дизель хакӗ чакнине палăртнă.
-
Раççейӗн спорт центрӗ Эльметре
2024 çулта Эльметре Триатлонăн федераллă центрне тума пуçлаççӗ. Тутарстанра Триатлон федерацин центрне уçасси пирки иртнӗ кӗркуннех калаçусем пулнăччӗ. Раççейре триатлон спорчӗпе аппаланакансен ăмăртусене хатӗрленме ятарлă центр пулманнипе çыхăннă вăл.
-
Тутарстанра пурçăн хурчӗпе нефтевани мелӗпе кӗрешеççӗ
Тутарстанра мăшăрсăр пурçăн хурчӗ çăмарта хурасран йывăçсен вуллисене нефтевани тăвас ӗçсем пыраççӗ. ТР Вăрман хуçалăх министерствин вăрман фондне хӳтӗлес тата сыхлас секторӗн заведующийӗ Анас Сенгатуллин каланă тăрăх, çак ӗçсене иртнӗ эрне вӗçне 2,9 пин гектар лаптăкра пурнăçланă.
-
Пучинкере учительсен аллейи уçăлчӗ
Юпа уйăхӗн 7-мӗшӗнче Чăваш Енри Йӗпреç муниципалитет округӗн Пучинке ялӗнче Вӗрентекенпе ăс паракан çулталăкне халалланă Учительсен аллейи уçăлчӗ. Пучинкере йывăç лартса Учительсен аллейине уçасси Чăваш наци конгресӗ çумӗнчи чăваш чӗлхипе литератури вӗрентекенсен пӗрлӗхӗн ырă сӗнӗвӗпе пулчӗ. Пархатарлă ӗçе Пучинке ял хутлăхӗн администрацийӗ, «Красный партизан» колхоз, Пучинке шкулӗ йӗркелерӗç.