Тутарстанра пурçăн хурчӗпе нефтевани мелӗпе кӗрешеççӗ

«Нефтевани вăл – пурçăн хурчӗ йывăç çинчи çăмарта хума пултаракан вырăнсене нефтепродуктсемпе сӗрни. Тӗслӗхрен, вăл машина çăвӗ е краççын пулма пултарать. Çак меслет сиенлӗ хуртсен хисепне самай чакарма пулăшать», – тесе ăнлантарать А.Сенгатуллин.  

Пурӗ кăçал 6,2 пин гектар лаптăк çинче нефтевани тума палăртнă. Ӗçсене ноябрӗн 1-мӗшӗнче вӗçлесшӗн.

Çавăн пекех халӗ республикăра мăшăрсăр пурçăн хуртне шута илессипе те ӗçлеççӗ. Ун хисепне кура тепӗр çул вăрмана сиен кӳрекен хуртсен йăвисене еплерех пӗтерессин мероприятийӗсене ирттерме документаци хатӗрлӗç.

Пӗлме: мăшăрсăр пурçăн хурчӗ (шелкопряд) – эребид çемйинчи лӗпӗш. Амипе аçи пӗр-пӗринчен питӗ уйрăлса тăраççӗ – кӗлеткипе те, тӗсӗпе те. Федерацин Атăлçи округӗнче мăшăрсăр пурçăн хурчӗ ӗрченине çавăн пекех Пушкăртстанра, Оренбург, Самара тата Ульяновск облаçӗсенче палăртнă. Сиенлӗ хурт ӗрченин тӗп сăлтавӗсем – лӗпӗшсем кӳршӗлле регионсенчен вӗçсе килни, хӗлсем ăшă тăни, çуркунне нӳрӗ çанталăк пулни тата кайăк-кӗшӗк хурт-кăпшанка сахалрах çини. Пурçăн хурчӗ çулçăсене çисен йывăçсем çав çулах тепӗр хут çулçă кăлараççӗ. Ăсчахсем каланă тăрăх, виçӗ çул харăс çулçисене хурт çисен çеç йывăçсен пӗтес хăрушлăх пур.

К.Малышев сăнӳкерчӗкӗ.