Мӗн-ши вăл литература?

Литературăна юратакансен, писательсен официаллă мар уявӗ ку. Ăна 1986 çулта Англире ПЕН-клубра уявлама йышăннă. Акăлчан чӗлхинчен куçарсан «пен» сăмах «калем» тенине пӗлтерет.

Кашни çын пурнăçӗнче литература хăйӗн вырăнне тупнă тесе шанас килет, писательсемшӗн вара çак ăнлав уйрăмах пысăк пӗлтерӗшлӗ. Эппин, мӗн-ши вăл литература? Калем ăстисене çак ыйтăва хуравлама ыйтрăмăр.

Чăваш халăх поэчӗ Юрий Сементер:

Чӗлхемӗрсен тӗп тытăмне

Пуянлатать литература,

Сăлтавсăр мар ун ытамне

Яланлăхах вырнаçнă Турă.

Чăваш халăх писателӗ Сергей Павлов: «Литературăна паян хамăн пурнăçран уйă­раймастăп та пулӗ. Чăнлăхпа литература тачă çыхăнса тăнăн туйăнать».

Чăваш халăх поэчӗ Раиса Сарпи: «Литература маншӑн – пурнӑç тытӑмӗ. Эп ачаллах кӗнеке, хаçат-журнал вуланӑ, литература урлă пурнӑçа ӑнланнӑ, паян кун та ун урлă пурӑнма вӗренетӗп».

Анатолий Хмыт: «Литература вӑл – халӑх историйӗ, халӑх пуласлӑхӗ».

Улькка Эльмен: «Литература маншӑн – пурнӑç».

Светлана Гордеева: «Ман шутпа, пур искусствăра та тӗпре литература тăрать, сцена çинчи тӗрлӗ жанр – опера, балет, спектакль… – аталанать. Тата, пӗлетӗр-и, литература шкулти манăн чи юратнă предметсенчен пӗри пулнă».

Валентина Тарават: «Литература маншăн çур пурнăç тенӗ пулăттăм. Эпӗ хай­лавсенче çутçанталăк, Турă хушнине вулакан патне çитерме тăрăшатăп».

Раиса Воробьева: «Литература маншӑн – вӗçсӗр-хӗрсӗр уçлӑх».

Людмила Сачкова: «Эпӗ мӗн ачаранах хама литературӑпа çыхӑнтарнӑ, паянхи кун та литература анинче тăрăшатăп, палăртса хунисем те нумай-ха. Маншӑн вӑл – чи хаклӑ та чи кирлӗ ӗç».

Наталья Селезнева: «Литература вăл – питӗ анлă тӗнче. Кашни поэта унта хăйӗн вырăнне тупма сунатăп».

Олег Кульев: «Литература маншӑн – Турӑ. Хайлав çырнӑ вăхăтра эпӗ, кӗлтунӑ чухнехи пекех, чунпа тасалатӑп». 

Владимир Степанов: «Литература вӑл – моделировани тени, чӑнлӑха улӑштарма май пурри».

Зоя Сывлӑмпи: «Литература маншӑн – чун киленӗвӗ».

Ольга Васильева: «Литература вăл – чун эмелӗ». 

Нина Пӑрчăкан: «Литература маншӑн – хавхалану, пурӑнма пулӑшакан вӑй». 

Нина Царыгина: «Литература вӑл – тӗттӗм патшалӑхри çутӑ пайăрки».

Ольга Австрийская: «Литература маншӑн – асамлӑх».

Лариса Петрова: «Литература вӑл – пурнӑç». 

Александр Николаев: «Литература маншăн, кирек мӗнле пултарулăх пекех – пуç мимин ӗçӗ».

Роза Степанова-Кӗлчечек: «Литература вăл – ачалӑх, çамрӑклӑх, аслӑ ӑру, юрату çинчен çырнӑ юрӑсем».

Туссем, сирӗншӗн вара мӗн-ши вăл литература?

Ольга ФЕДОРОВА 

хатӗрленӗ.

Автор сăнӳкерчӗкӗ.