Тутарстан команди «Абилимпиксра» 2-мӗш вырăн йышăннă

Тутарстансем «Абилимпикс» инвалидсемпе сывлăх енчен çирӗпех мар çынсен хушшинче иртекен профессилле ăсталăхăн наци чемпионатӗнчен çӗнтерӳпе таврăннă – 2-мӗш вырăн йышăннă. Вăл Мускавра октябрӗн 31 – ноябрӗн 3-мӗшӗсенче иртнӗ. Конкурсантсене Хусанти чукун çул вокзалӗнче ӗнер чаплăн кӗтсе илнӗ.

«Тутарстансем кашни çул наградăсем çӗнсе илеççӗ. Кăçал та вӗсем хăйсем çӗнтерессишӗн пӗтӗм вăйран тăрăшнине кăтартса пачӗç. Вӗсем Тутарстанăн çеç мар, Раççейӗн мăнаçлăхӗ. Республикăн делегацине 254 çын кӗнӗ, вӗсенчен 103-шӗ – конкурсантсем. Кашни компетенциех хутшăнчӗç, наградăсене тивӗçрӗç. Пурӗ Тутарстан сборнăйӗ 76 медале тивӗçрӗ», – чемпионат пӗтӗмлетӗвӗпе журналистсене паллаштарнă ТР вӗрентӳпе наука министрӗ Ильсур Хадиуллин.

«Абилимпикс» чемпионат «Çамрăксем тата ачасем» наци проекчӗн «Профессионалитет» федераллă проекчӗн шайӗнче иртет. Ăмăртура 70 тӗрлӗ компетенци, вӗсенчен 50-шӗ – тӗп, 12-шӗ – хăтлав шайӗнче, 8-шӗ – халăхсен хушшинчи.

Ильсур Хадиуллин каланă тăрăх, унта хутшăнакансем пурте ӗç тупаççӗ. Вӗсене республикăри предприятисенче хапăл туса кӗтеççӗ.

Наци чемпионачӗн пӗтӗмлетӗвӗсемпе тутарстансем 30 ылтăн, 26 кӗмӗл, 20 бронза медаль çӗнсе илнӗ. Асăннă чемпионатра 2-мӗш вырăна Тутарстан Санкт-Петербургпа пайланă. 1-мӗш вырăнта – Мускав, 3-мӗшӗнче – Мускав облаçӗ.

Сăнӳкерчӗксем ТР Вӗрентӳпе наука министерствин пресс-службин.