Республикăра 49 çамрăк çын хваттерлӗ пулнă

Республикăра çамрăксен хушшинче кил-çурт енӗпе иртнӗ конкурсăн  çӗнтерӳçисене палăртнă. Пӗтӗмпе асăннă конкурса тӗрлӗ хулапа районсенчен 236 çын хутшăннă. Вӗсенчен 49-шӗ çӗнтерӳçӗ шутне кӗнӗ. Çамрăксене тӗрлӗ майпа пулăшасси «Молодежь и дети» наци проектне тивӗçтерет, пӗлтерет ТР Çамрăксен ӗçӗсен министерствин пресс-служби.  

«Кил-çурт конкурсӗ çамрăксене пулăшассин чи кирлӗ мерисенчен пӗри. Пирӗн ведомство тăватă программăпа куратор пулса тăрать. Ку конкурс Тутарстан Республикин çамрăксен политикине пурнăçлассине активлă хутшăнакан тӗрлӗ категорие кӗрекен çамрăксем хутшăнма пултарнипе уйрăлса тăрать, çемье лару-тăрăвӗ мӗнле пулни пӗлтерӗшлех мар», – тенӗ ТР çамрăксен ӗçӗсен министрӗ Ринат Садыков.

Министр палăртнă тăрăх, ТР Раисӗ Рустам Минниханов тӗревне пула конкурс 2012 çултанпа пурнăçланса пырать. Пӗрремӗш конкурс пӗтӗмлетӗвӗсемпе ун чух çамрăксен проекчӗсемпе программисене хутшăннă активистсене социаллă ипотекăпа 12 хваттер пама йышăннă. Çулсерен хваттерсен шучӗ ӳссе пынă. 2014 çултанпа тăтăш 49 çӗнтерӳçӗне палăртаççӗ. Çапла 2012 çултанпа 489 çын хваттерлӗ пулнă.

Конкурса хутшăнассин тӗп условийӗсенчен пӗри – пӗр çын пуçне пурăнмалли лаптăк 18 тăваткал метртан сахаларх пулни. Çӗнтерес пулсан суйланă хваттершӗн ун пӗтӗмӗшле хакӗнчен 10 процентне тӳлемелле. Çавна май, паллах, тӗп критерисенчен пӗри тӳлеме пултараслăх, яланхи ӗç пурри пулса тăрать. Çакна çирӗп пăхаççӗ, мӗншӗн тесен уйăхсерен ипотекăшăн тӳлеме çынна йывăрлăха кӗртсе ӳкересшӗн мар.

Конкурса «Лига студентов Республики Татарстан» регионри обществăлла организаци ТР Çамрăксен ӗçӗсен министерствипе тата ТР Раисӗ çумӗнчи Патшалăх кил-çурт фончӗпе пӗрле ирттереççӗ.

Конкурса хутшăнас, заявка парас йӗркепе «Молодежный жилищный конкурс Республики Татарстан» официаллă ушкăнра паллашма пулать.

Сăнӳкерчӗксем: Рамиль Гали (Татар-информ) тата  https://minmol.tatarstan.ru сайтран.