Кунта Васильевкăпа Кӗçӗн Акташра пурăнакансем СВОри салтаксем валли маскировка сеткисем çыхаççӗ. Тăрăшуллă волонтерсем 230 ытла сетка çыхнă та ӗнтӗ ку таранччен.
Волонтерсен хушшинче çамрăксем те пур
Васильевкăри волонтерсен ушкăнӗнче паянхи куна тӗрлӗ çулти 16 çын. Кунта çап-çамрăккисем те пур, 70-тен иртнисем те: Алевтина Георгиевна Харитонова, Нина Егоровна Матюшкина, Вера Ивановна Абросимова, Вера Михайловна Михайлова, Галина Сергеевна Падимирова, Флёра Васильевна Матюшкина, Валентина Павловна Сидорова, Нина Демьяновна Назарова, Тамара Павловна Редискина, Роза Алексеевна Андреева, Татьяна Ананьевна Сидорова, Вера Геннадьевна Матюшкина, Светлана Анатольевна Назарова, Наталия Давыдовна Сафронова тата çамрăк Артём Матюшкинпа Антон Сафронов.
Волонтерсен ушкăнне нумай ачаллă хастар хӗрарăм Наталия Сафронова ертсе пырать. Вăл пӗлсе йӗркеленипе кунта ӗç икӗ сменăпа пырать: кăнтăрла аслăрах çултисем маскировка сетки çыхаççӗ, каçпа – çамрăкраххисем. Наталия Давыдовнăна мăшăрӗ Геннадий Сафронов тата пиччӗшӗ Юрий Назаров та пулăшаççӗ.
Волонтерсен ӗçӗ сетка çыхнипех вӗçленмест. Кунта типӗ яшка валли пахча çимӗç те хатӗрлеççӗ, салтаксене кирлӗ япаласем туянма укçа та пуçтараççӗ. Сăмах май, волонтерсем çак ӗçе хастар хутшăнакан Вера Ивановна Абросимовăна «Сувар» хаçат та çырăнса пачӗç.
Саврăш ял хутлăхӗн çулленхи пухăвӗнче Васильевка волонтерӗсем Аксу район пуçлăхӗн Алмаз Мингазовăн Тав хутне тивӗçрӗç. Вӗсене Саврăш ял хутлăхӗн пуçлăхӗ Ильнур Минсалихович Сафин та яланах тӗрев парать, пӗр пулăма та тимлӗхсӗр хăвармасть, уявсенче саламлама ятарласах килет.
Тата çак тӗлӗнмелле ырă кăмăллă хӗрарăмсем – ял пурнăçӗн илемне упракансем. Клуб çуккипе волонтерсен штабӗ Васильевкăра халăха пӗр çӗре пухакан кăмăллă вырăн пулса тăрать. Çӗнӗ çул уявӗсем те, Пӗтӗм тӗнчери хӗрарăмсен кунӗ те, Çемье уявӗ те, волонтерсен тӗлпулăвӗсем те – йăлтах кунта иртеççӗ. Паллах, Тăван çӗршыв хӳтӗлевçин, Çӗнтерӳ, Асăнупа хурлану кунӗ пек патриотла уявсене те манмаççӗ – тивӗçлӗн паллă тăваççӗ.
Акă октябрӗн 6-мӗшӗнче Васильевкăри волонтерсен штабӗнче черетлӗ мероприяти иртрӗ. Хальхинче ăна Ватăсен кунне халалланăччӗ. Аксури, Саврăшпуçӗнчи волонтерсем те ятарласах килнӗччӗ кунта. Хăнасене Наталия Сафронова кăмăллăн кӗтсе илчӗ.
Аксури Волонтерсен центрӗн волонтерӗ Галина Киселева Васильевкăри тăрăшса ӗçлекен «кӗмӗл» волонтерсене ăшшăн саламларӗ, уйрăмах салтак амăшне Нина Матюшкинана палăртрӗ.
Çӗнтерӗве шанса ӗçлеççӗ
Тӗлпулура Галина Падимировăна, Иван Григорьева, Анатолий Матюшкина тата çамрăк волонтерсене Артем Матюшкинпа Антон Сафронова Аксури «Служу Отечеству» Çар ветеранӗсен пӗрлӗхӗн тата Волонтерсен центрӗн Тав хучӗсене парса чысларӗç. Çамрăксем кунта аслисем ӗçленине пăхса лармаççӗ, вӗсемпе тан тăрăшаççӗ.
Саврăшпуç ялӗн библиотекарӗ, ялти волонтерсен ертӳçи Татьяна Максимова кăçал тутар халăх поэчӗ Габдулла Тукай çуралнăранпа 140 çул çитнине аса илтерчӗ, пухăннисене паллă поэта халалланă кӗнеке куравӗпе паллаштарчӗ. Тутар поэчӗн сăввисене вулакансем те пулчӗç. Унтан пурте пӗрле чей ӗçрӗç, тутлă хуплу çирӗç. Галина Киселева Аксу волонтерӗсем СВО зонине 57-мӗш гуманитари пулăшăвне леçме кайма хатӗрленни пирки каласа пачӗ.
Тӗлпулу юрă-кӗвӗсӗр епле пултăр-ха ӗнтӗ? Пилӗк ача амăшӗн Татьяна Алексееван пӗтӗм ыратăвӗпе хумханăвӗ вăл юрланă юрăра палăрчӗ. Татьяна нумай пулмасть мăшăрне çапăçу хирне ăсатнă. Михаил Максимов купăс каласа ташлаттарчӗ пурне те.
Кун пек тӗлпулусем кашни кун ырми-канми сетка çыхакан волонтерсене уçă сывлăш пек кирлӗ. Ыранах вӗсем çак çутă та, шыв та çук кивӗ шкул çуртне таврăнса хăйсен ӗçне малалла тăсӗç. Хӗллехи вăхăтра хутса ăшăтма хăйсемех вутă та хатӗрлесе хунă. Вӗсем сехет çине пăхмаççӗ, награда кӗтмеççӗ – кӗçех çӗнтерӳ пуласса шанса ӗçлеççӗ те ӗçлеççӗ.
Кивӗ шкулта волонтерсем тăрăшнипе çутă çуннă, хăюсем шăлтăртатнă чух вара Васильевкăра пурнăç малалла тăсăлать. Пӗчӗк ялта пурăнакансем пуринчен ытла тăшманпа çапăçакан паттăрсем пирки шутлаççӗ, вӗсене пулăшас тесе тăрăшаççӗ, çӗнтерӗве куç пек кӗтеççӗ.
Татьяна МАКСИМОВА.
Автор сăнӳкерчӗкӗсем.
Нет комментариев