Алексеевски районӗнчи Чăваш Майнинче Ял кунӗ иртрӗ

Уйрӑмах ӗç ветеранӗсене, юбилей паллӑ тӑвакансене, нумай çул пурӑнакансене, вырӑнти шкултан вӗренсе тухнисене, çамрӑк çемьесене, ялти пурнӑçа çутӑрах та интереслӗрех тӑвакан ​​хастар çынсене чысларӗç. Ятарлӑ çар операцине хутшăнакан ял çыннисене те тав турӗç.

Уяв программинчи концерта Алексеевски, Аксу, Чистай, Çӗнӗ Шуçӑм районӗсен пултаруллӑ артисчӗсем хутшӑнчӗç, халăха хăйсен пултарулăхӗпе савăнтарчӗç.

Йӑлана кӗнӗ халӑх вӑййисем те пулчӗç уявра. Сӑмахран, наци кӗрешӗвӗ. Хутшăнакансем те, куракансем те йышлăччӗ. Ачасем валли те, çитӗннисем валли те савӑнӑçлӑ площадка йӗркеленӗ. Ярмӑрккӑра хӑнасем алӑ ӗçӗсем туянма, тутлӑ апат-çимӗçе тутанса пӑхма пултарчӗç.

Уяв каçхине Шупашкартан килнӗ чӑваш эстрада артисчӗсем – Алина Михайлова, Лариса Пасхина тата Виктор Горелов – хутшӑннипе иртнӗ дискотекӑпа вӗçленчӗ. Артистсем чăвашмайнисене савăнтармаллипех савăнтарчӗç.

Çак уява ирттерме ял çыннисем хӑйсем спонсорла пулӑшу пачӗç. Вӗсем тăрăшнипе мероприяти çивӗч те анлӑ, чун-чӗререн иртрӗ.

Ял кунне çапла кăмăллă ирттерни Чăваш Майнинче пурăнакансене тăван тăрăха юратма, унпа мăнаçланма, ялшăн тата та ытларах тăрăшма хавхалантарчӗ.

Генадий ФЕДОРОВ.

Автор сăнӳкерчӗкӗсем.