Ăшă сăмах чуна ăшăтать

Наталья Сергеевна çула пушă алăпа тухман, пӗртен-пӗр ывăлӗн ӗçтешӗсем валли вăл газ отраслӗн символикипе, «Ӗçтешсемпе юлташсене» тесе çырса илемлетнӗ тортпа тата курник пӗçерсе килнӗ. Кун çинчен район хаçачӗн сайчӗ пӗлтерет.

 – Ывăлăмăр кайсан мăшăрпа иксӗмӗр мӗнле пурăнăпăр-ши тесе пăшăрхантăмăр. Эпир пӗччен мар иккен, коллективăр яланах юнашар, пулăшу кирлӗ пулсан самантрах çитет. Тав сире пире пăрахманшăн, ку пире питӗ савăнтарать. Кашнийӗршӗн пирӗн алăксем уçă. Эсир килни пысăк уяв пирӗншӗн,– тенӗ Наталья Сергеевна коллектива тав туса.

Чей ӗçнӗ хушăра хӳтӗлевçӗ-ӗçтешӗн амăшӗ валли кашнин ăшă сăмах тупăннă. «Эсир вăйлă, хăюллă хӗрарăм. Мăшăрăрпа Геннадий Павловичпа çакăн пек ывăл çуртса ӳстернӗшӗн тав тăватпăр. Эпир пурте Сергейшӗн пăшăрханатпăр. Шанатпăр, унăн йăлтах аван пулать. Вăл ырă та тӳрӗ кăмăллă çын. Эсир кӗл туни ăна тата ун çумӗнчисене çитетех»,– ăшшăн калаçнă ӗçтешӗсем Наталья Сергеевнăпа.

Эпир пӗлнӗ тăрăх, Сергей Леонтьева ӗçтешӗсем чăнах та пăрахмаççӗ, май çитнӗ таран яланах пулăшма тăрăшаççӗ. Малашне те пăрахмӗç. Аксу РЭГС ертӳçи Александр Мартынов хальхинче те çакна палăртса коллектива тав тунă. «Эпир яланах çыхăнура, хуть мӗнле ыйту пулсан та шăнкăравлăр, пулăшма яланах хатӗр эпир. Ывăлăра, хамăрăн ӗçтеше Сергее эпир Çӗнтерӳпе таврăнасса кӗтетпӗр»,– тенӗ вăл.  (Аксу район хаçачӗн сăнӳкерчӗкӗ).